Klip «Małyš» byłoj vakalistki hurta «Leninhrad» Alisy Voks, u jakim krytykujucca školniki, jakija vychodziać na akcyi pratestu, źniaty pa zamovie «dziaržstruktur» za dva miljony rasijskich rubloŭ (35 tys. dalaraŭ), paviedamlaje Meduza, spasyłajučysia na ananimnuju krynicu, blizkuju da śpiavački.
U klipie, jaki vyjšaŭ 15 maja, śpiavačka ŭ vobrazie nastaŭnicy raić školnikam, jakija vychodziać na akcyi pratestu z čatyrma pamyłkami na płakacie ŭ dvuch słovach, ŭziacca za rozum i «pačać ź siabie»: «Učiťsia na ošibkach nie pozdno nikohda, / Raz sierdcie chočiet pieriemien, tohda načni s siebia»,- śpiavajecca ŭ pieśni.
Krynica vydańnia na ŭmovach ananimnaści raspaviała sa słoŭ śpiavački i jaje muzykaŭ, što im prapanavali «abkłaści apazicyju», zapłaciŭšy za heta kala dvuch miljonaŭ rubloŭ. Muzyki pahadzilisia, raźličvajučy na budučyja karparatyŭnyja zamovy, i prydumali, «jak zrabić heta efiektna».
Sama śpiavačka na prośbu heta prakamientavać zajaviła, što jaje «Zadałbali hetyja pytańni» i što jana «biare tajm-aŭt» i «sychodzić u radyjomaŭčańnie». «Ja pisała pieśniu nie pra palityku, na chrana jany mianie tudy pryplali, ja nie razumieju», — skazała śpiavačka.
Raniej u intervju RBK-TB jana nazvała pieśniu «chitom», jaki «zachapiŭ vialikuju kolkaść rozumaŭ». «Ja nikoli nie raźličvaju na kankretnuju aŭdytoryju», - zajaviła śpiavačka. «Maja pieśnia dla tych, chto ličyć, što pieršasna atrymać adukacyju, jak by, kimści stać, adbycca ŭ žyćci, a potym užo prajaŭlać hramadzianskuju pazicyju, hruntujučysia na niejkim vopycie», - patłumačyła jana.
Pa dadzienych krynic telekanała «Dožd́», blizkich da Kramla, zdymki klipa arhanizavaŭ eks-supracoŭnik administracyi prezidenta Mikita Ivanoŭ. Pa słovach adnaho z surazmoŭcaŭ, Ivanoŭ vystupaŭ i zamoŭcam, i aŭtaram kancepcyi klipa.
Mikita Ivanoŭ pracuje z administracyjaj prezidenta z 1999 hoda, kali jon uvachodziŭ u vybarčy štab Uładzimira Pucina. Doŭhi čas jon asacyjavaŭsia z kurataram unutranaj palityki Uładzisłavam Surkovym.
Aficyjna Ivanoŭ pracavaŭ u Kramli z 2005 pa 2009 hod i adkazvaŭ za pracu kramloŭskich moładzievych arhanizacyj, u tym liku ruchu «Našy». Zatym jon pracavaŭ u «Adzinaj Rasiei» i adnačasova zastavaŭsia daradcam Surkova.
Siarhiej Šnuraŭ adhuknuŭsia na pieśniu «Małyš» dvojčy. 16 maja ŭ Instagram jon apublikavaŭ vierš, u jakim, u pryvatnaści, havaryłasia, što «małyja nie durni» i nie ŭsprymajuć prapahandu, takuju, što nadaje im: «Živitie, dieti, moł, nie šibko, / V svobodie krojetsia ošibka».
U inšym paście Šnuraŭ raskrytykavaŭ klip na pieśniu, u jakim, pavodle jaho słoŭ, «usio chałturna», i źviarnuŭ pretenzii śpiavački, vykazanyja školnikam, da jaje samoj: «Luboje vykazvańnie, tym bolš u zahadnym ładzie, jakoje pretenduje na nakiroŭvajučuju rolu, jakoje b jano ni było pa źmieście, pavinna, pa mienšaj miery, nie kanfliktavać z formaj. Kali ty zdymaješ rolik jakaściu nižej, čym u pačatkoŭca videabłohiera, dzie chałturna ŭsio: hrym, śviatło, rakursy, mantaž; pišaš tekst, jaki navat na samaj nikčemnaj placoŭcy nie ŭsprymuć z-za zusim daškolnych i niecikavych ryfmaŭ, to nastaŭnictva vyhladaje prosta niedarečna. Tak, tak. Mienavita. «Pačni ź siabie», - havorycca ŭ dopisie.
Alisa Voks-Burmistrava śpiavała ŭ hrupie «Leninhrad» z 2012 hoda. U sakaviku 2016 hoda jana pakinuła hurt na piku papularnaści pieśni «Ekspanat» pra hierainiu «na łabutienach». Lidar «Leninhrada» paśla jaje sychodu zajaviŭ, što «stvaryŭ hierainiu mifa ź ničoha».
