Palityk Mikałaj Statkievič raskazaŭ «Našaj Nivie», što atrymaŭ ad svajho paplečnika — Siarhieja Kunceviča — piśmovaje paviedamleńnie ź SIZA KDB.
Siarhiej Kuncevič — heta toj čałaviek, jaki pryvioz hukaŭzmacnialnuju aparaturu ŭ rajon Akademii Navuk, dzie 25 sakavika mieŭsia adbycca mitynh.
U hetaj mašynie paśla nibyta znajšli kaktejli Mołatava, i ciapier Kuncevič — adzin ź fihurantaŭ spravy «ab padrychtoŭcy masavych biesparadkaŭ».
Jak śćviardžaje Statkievič, u svaim piśmovym paviedamleńni (šlach atrymańnia palityk nie vydaje, kab nie navieści naŭprost na pieradatčyka) Kuncevič razvažaje pra ŭzajemaźviazanaść stanu ekanomiki i pašyreńnia represij, pra pravakacyju z butelkami.
«Byli katavańni elektrašokieram. Chacieli daviedacca, dzie Mikałaj», — pracytavaŭ nam taksama vytrymku ź lista Statkievič.
Na našaje pytańnie, ci možna dapuścić, što heta niapraŭda, Statkievič adkazaŭ tak:
«Ciapier ja nie mahu apublikavać fota lista, bo nie viedaju jaho pazicyju. Ci budzie jon pryznavać fakt pieradačy, ci nie. Ale my paraŭnoŭvali počyrk i ŭpeŭnienyja, što paviedamleńnie naležyć Siarhieju. Jon tut piša taksama, što chacieŭ by, kab hetaje paviedamleńnie było pieradadzienaje ŭ ŚMI».
Siarhiej Kuncevič.
Pavodle Statkieviča, katavańnie elektrašokieram mahło adbycca adrazu paśla zatrymańnia — tady sam palityk jašče chavaŭsia pierad Dniom Voli i jaho, maŭlaŭ, šukała KDB, kab izalavać.
«Mnie tady [kali znajšli] taki kapitan KDB Vasileŭski P.P. skazaŭ: «Nu my za vami i pabiehali». Napeŭna, jon moža viedać bolej», — vykazaŭsia nakont mierkavanych katavańniaŭ Statkievič i dadaŭ, što Kunceviča dahetul trymajuć u SIZA, kab jon, u tym liku, nie raskazaŭ pra mietady dopytaŭ.
«Vychodziać ludzi, ich adpuskajuć i jany maŭčać, — skazaŭ Statkievič, majučy na ŭvazie «spravu patryjotaŭ. — Bo nibyta jany dali padpisku ab nierazhałošvańni. U toj ža čas ich paplečniki [Siarhiej Čysłaŭ - Red.] kažuć, što ich katavali i źbivali, i psichatropy ŭžyvali taksama. Ale sami jany maŭčać. Ja miarkuju, što jany robiać nie zusim maralna. Nijakaja padpiska ab nierazhałošvańni nie dziejničaje, kali suprać vas ździejśniena złačynstva. Heta zabaroniena artykułam 20 Kanstytucyi — katavańni nie dapuskajucca. Tamu, kali jany byli, a vy maŭčycie — to tyja vašyja siabry, jakija tam jašče znachodziacca, padviarhajucca katavańniam. A Kuncevič nie vajskoviec, nie treniravaŭsia, nie mačo, ale znajšoŭ mahčymaść pieradać adtul paviedamleńnie».
Ciapier u płanach palityka — zvarot da Čyrvonaha Kryža z prośbaj naviedać Kunceviča ŭ SIZA.
My taksama źviarnulisia ŭ pres-słužbu KDB, ale tam słovy Statkieviča kamientavać nie stali.
