Biudžetnaje kiravańnie Biełaha doma apublikavała prajekt biudžetu ZŠA na nastupny finansavy hod — pieršy taki dakumient Administracyi prezidenta Donalda Trampa. Klučavaja ideja — źmianšeńnie roli dziaržavy ŭ amierykanskim hramadstvie za košt skaračeńnia sacyjalna aryjentavanych prahram, piša RBK.
Ahułam 62-staronkavy dakumient praduhledžvaje skaračeńnie dziaržraschodaŭ na $3,6 trłn ŭ bližejšyja dziesiać hadoŭ. Hetyja miery baluča ŭdarać pa šmatlikich prychilnikach Trampa ź liku ahraryjaŭ i rabotnikaŭ z dachodami nižej za pražytačny minimum, jakija zabiaśpiečyli jamu pieramohu na prezidenckich vybarach, śćviardžajuć amierykanskija ahladalniki.
Płanavany siekviestr — najbujniejšy z kali-niebudź prapanavanych amierykanskimi prezidentami. Prajekt praduhledžvaje skaračeńnie finansavańnia takich sacyjalnych prahram, jak praduktovyja karty dla małamajomnych, lhoty dla vypusknikoŭ VNU, subsidyi fiermierskim haspadarkam, miedycynskaje zabieśpiačeńnie dla ludziej z abmiežavanymi dachodami Medicaid.
Mienavita tamu ŭ biudžetnaha płana Trampa mała prychilnikaŭ u kanhresie navat siarod respublikancaŭ, jakija pradstaŭlajuć akruhi, što padtrymali jaho na vybarach, adznačaje Bloomberg.
«Heta pieršy biudžet padatkapłacielščykaŭ», — acharaktaryzavaŭ dakumient dyrektar Biudžetnaha ŭpraŭleńnia ZŠA Mik Małviejni, majučy na ŭvazie, što prajekt abaraniaje pierš za ŭsio intaresy płaciežazdolnych hramadzian. «My bolš nie budziem vymiarać spačuvańnie kolkaściu [sacyjalnych] prahram abo ludziej, jakija imi karystajucca, — apisaŭ jon sutnaść prajekta biudžetu. — My budziem vymiarać spačuvańnie i pośpiech kolkaściu ludziej, jakim my dapamahajem vyjści z hetych prahram i viarnuć sabie kantrol nad ułasnym žyćciom».
Hałoŭnym dasiahnieńniem płana Trampa pavinna stać likvidacyja biudžetnaha deficytu, jaki za apošnija dziesiać finansavych hadoŭ składaŭ u siarednim $790 młrd za hod. Zbałansavać fiederalny biudžet administracyja choča na praciahu 10 hadoŭ. Ale dasiahnieńnie hetaj mety zaležyć ad padatkovaj reformy, detalovyja paramietry jakoj administracyja pakul nie raskryła.
