Darja Baranoŭskaja.
Daša žyvie ŭ Dziaržynsku, vučycca na fakultecie fiłasofii i sacyjalnych navuk BDU: zaŭtrašni śpiecyjalist u halinie pijaru. Cikava, što dziaŭčyna ŭ hod svajho naboru prademanstravała samyja vysokija bały. Budučy studentkaj, jana ŭžo i raniej sprabavała siabie ŭ karysnych hramadstvu aktyŭnaściach. U ramkach Akademii studenckaha lidarstva jana prezientavała prajekt, jaki dapamahaŭ vyrašyć prablemu z mocnym choładam u internatach. Kali pra takuju «pazaštatnuju» dziejnaść daviedalisia na fakultecie, Dašu adrazu ž vyzvali ŭ dekanat i jasna dali zrazumieć, što jana takim čynam niasłavić jaho honar. Ciapier, kali dziaŭčyna atrymała dypłom finalista Social Weekend, jana znoŭ trapiła ŭ miłaść kiraŭnictva.
«Čynoŭniki niaredka miarkujuć, što studenty, jakija zajmajucca niaŭradavymi prajektami, — drennyja. Na samaj spravie, takija ludzi, naadvarot, — adny z najlepšych na fakultecie, jany žadajuć łakalna źmianiać vakoł siabie śviet», — kamientuje Hleb.
Hleb Vajkul.
Darečy, moža, i vykładčyki Hleba razam z dekanam škadujuć, što stracili dobraha studenta: Hleba adličyli ź fiłfaka BDU paśla ŭdziełu ŭ maršy studentaŭ, što pratestavali suprać płatnych pierazdač.
Ciapier Hleb vymušany źjazdžać vučycca za miažu, bo, kali tut znoŭ buduć prablemy, jaho zahrabuć u vojska. A jon ščyra choča atrymać adukacyju, nie marnujučy čas na vojska. Pry hetym Hleb upeŭnieny, što časovy pierajezd nie pieraškodzić jamu zajmacca na radzimie jak i «Hukami mietro», tak i prymać udzieł u raźvićci novaj palityčnaj arhanizacyi «Dzieja», jakuju stvaryŭ Aleś Łahviniec.
Hleb žartuje i spadziajecca, što jaho apazicyjnaść nie paŭpłyvaje na realizacyju prajekta. Zaraz ža ŭsio składvajecca jak nielha lepš: pieršy rolik z pałanezam «Paŭnočnaja zorka» Napaleona Ordy ŭžo 1 červienia budzie hučać u mietro razoŭ dziesiać za dzień. Pakul što z prostaj vizualizacyjaj, ale chutka maładyja ludzi znojduć dyzajniera, jaki dapamoža zrabić dla vydatnaj muzyki adpaviedny videašerah.
A pačałosia ŭsio ź idei.
«Ni ja, ni Hleb nijak nie źviazany z muzykaj, my nie chadzili ŭ profilnyja škoły, i ŭ nas navat słychu niama! My prosta lubim muzyku. I ličym, što ŭ Biełarusi vielmi raźvitaja kultura, ale sami žychary, na žal, heta drenna viedajuć. I treba hetyja fakty papularyzavać», — raskazvaje Daša.
«Ja ŭvohule liču, što kultura — heta samaje hałoŭnaje, što moža być u hramadstva. Nacyi z mocnaj kulturaj buduć žyć viečna, a my praz muzyku imkniomsia pavysić ahulny ŭzrovień kultury», — padchoplivaje Hleb. Za im adrazu praciahvaje Daša: «I kali ŭsie zrazumiejuć, što my — heta nie tolki Saładucha, tady niešta, moža, źmienicca».
Sami aktyvisty słuchajuć roznuju muzyku. Sučasnuju biełaruskuju ŭ tym liku. Za 10 miesiacaŭ jany naviedali kala 70 mierapryjemstvaŭ, siarod jakich byli vystupy i Brutto, i Volskaha, i «Dzieciuki», i šmat chto jašče. Uličvajučy raznastajnaść svaich muzyčnych pieravah, pieršapačatkova jany chacieli stvaryć prajekt z roznymi žanrami, ale pakul vyrašyli patestavać reakcyju ludziej na samym niejtralnym.
Varta adznačyć, što ŭ samym pačatku realizacyi prajekta Hleb i Daša nakiravalisia za paradami naŭprost u Biełaruskuju akademiju muzyki, ale tamtejšyja ideołahi, pačuŭšy biełaruskuju movu i ŭbačyŭšy na šapcy Pahoniu, adreahavali choładna i admovili ŭ dapamozie. Prafiesijna skłaści śpis trekaŭ ź biełaruskimi kłasičnymi kampazicyjami vyzvałasia vypadkova znojdzienaja ŭ sacsietkach studentka akademii Volha Fiodarava. Paśla Nacyjanalny centr intelektualnaj majomaści pravieryŭ tvory na pradmiet aŭtarskich pravoŭ: amal 80% z adabranaha znachodzicca ŭ volnym dostupie, tak što aktyvistam nie daviadziecca płacić za toje, kab usie my słuchali pad ziamloj kłasikaŭ.
Znajści ž vychad na mietro dapamoh Siarhiej Karniłaŭ, jaki pradstaŭlaje novuju dla Biełarusi prafiesiju — GR-mieniedžar, čałaviek, jaki dapamahaje naładzić dyjałoh z orhanami ŭłady. Mienavita jon paraiŭ pisać listy nie prosta na imia dyrektara mietro (na listy fizičnych asob čynoŭniki, zvyčajna, uvahi nie źviartajuć), a na kampaniju «BiełRosRekłama», jakaja ŭ vyniku i stała apiekunom «Hukaŭ mietro».
Jość u hetaj historyi i jašče adzin fajny momant. Mienavita dziakujučy aktyvizmu — na škole mieniedžaraŭ, što ładzić «Art-Siadziba», Hleb z Dašaj i paznajomilisia. Praź niekatory čas sustrelisia znoŭ i zrazumieli: heta znak. Padobnyja cikaŭnaści i luboŭ da kulturnych i adukacyjnych prajektaŭ źlapili ź ich novuju ščaślivuju paru. Vysnova naprošvajecca adna: budźcie aktyŭnymi — i abaviazkova sustreniecie svajo kachańnie.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»
