Polski palicyjant staŭ donaram špiku (kaściavoha mozhu) dla 5-hadovaj dziaŭčynki ź Biełarusi. Andžej Vašak žyvie i pracuje ŭ horadzie Słubice na zachadzie Polščy. Radyjo Svaboda datelefanavałasia da polskaha palicyjanta.
«Stać donaram ja vyrašyŭ paśla hučnaj hramadzkaj kampanii, jakaja adbyvałasia ŭ našym horadzie. Adna z fundacyjaŭ zaachvočvała stać donaram špiku. Ja padumaŭ, a čamu b mnie nie zarehistravacca i nie dapamahčy», — apaviadaje palicyjant.
Try hady tamu Andžej Vašak zarehistravaŭsia ŭ bazie źviestak maciarynskich kletak. Isnujuć dva metady pierasadki kaściavoha špiku: z hrebieniu kłubavičnaj kostki abo z peryferyčnaj kryvi. Andžej Vašak vybraŭ pieršy metad. Pierasadka adbyvałasia pad narkozam.
«Heta absalutna biaśpiečnaja forma pierasadki. Kali čałaviek zdarovy, to niama nijakaj ryzyki», — kaža Vašak.
Kali čałaviek zapisvajecca donaram, to jon nia viedaje zahadzia, chto stanie atrymalnikam jahonaha špiku. Baza źviestak adkrytaja dla pacyjentaŭ z usiaho śvietu.
«Špik u mianie ŭziali ŭ krasaviku va Ŭrocłavie. Zatym mnie pazvanili z fondu i skazali, što jaho pierasadzili 5-hadovaj dziaŭčyncy ź Biełarusi. Heta adzinaja infarmacyja, jakuju dazvolena ahučvać. Kali ja daznaŭsia, što heta dzicia, to ja vielmi ŭzradavaŭsia. U mianie ŭ samoha syn u hetym uzroście, tamu dla mianie heta stała padvojnaj radaściu. Nacyjanalnaść nia maje dla mianie nijakaha značeńnia. Hałoŭnaje, što ja zmoh dapamahčy. Vielmi spadziajusia, što ŭ maleńkaj biełaruski ŭsio budzie cudoŭna. Žyćcio — heta samaje kaštoŭnaje, što moža padaravać inšamu», — skazaŭ Andžej Vašak.
Pavodle praviłaŭ, nie raniej čym praz dva hady, kali pacyjent papravicca, fond, jaki pasiaredničaŭ u pierasadcy, arhanizuje sustreču donara i pacyjenta. Na heta musiać pahadzicca abodva baki. U interviju Svabodzie Andžej Vašak skazaŭ, što vielmi spadziajecca na sustreču i zaachvočvaje inšych stać donarami.
«Jość roznyja sposaby heta zrabić. Zaklikaju ŭsich dałučycca da hetaj inicyjatyvy. Pierasadka nia zrobić škody zdaroŭju, heta nie balić. A ŭžo praz paru tydniaŭ vy całkam viernieciesia ŭ raniejšuju formu».
