U nastupny paniadziełak na «Biełsacie» zjavicca štodzionnaja prahrama «Vot tak» na rasiejskaj movie. My raspytali dyrektarku telekanału Ahniešku Ramašeŭskuju-Huzy, čamu prahramu vyrašyli nie rabić pa-biełarusku i ci źbirajecca «Biełsat» u budučyni pierajści na rasiejskuju movu.
— Infarmacyja pra toje, što na «Biełsacie» źjavicca prahrama pa-rasiejsku, vyklikała burnuju reakcyju siarod biełaruskich patryjotaŭ. Što my možam im adkazać?
— «Biełsat» nie pierachodzić na rasiejskuju movu, bo kali b my chacieli, to mahli b zrabić heta ŭžo daŭno. Asnoŭnaj movaj telekanału zastaniecca biełaruskaja. Heta naša pryncypovaja pazicyja. U toj ža čas my vielmi daŭno dumali pra vyjście za miežy Biełarusi dy vykarystańnie rasiejskaj movy. Siońnia «Biełsat» dasiažny nie tolki va Ukrainie i krainach Bałtyi, ale i ŭ Rasiei. My majem unikalny kalektyŭ i mnostva mahčymaściaŭ. Hrech hetaha nie vykarystać. Ja liču, što kali buduć mahčymaści, to ŭ budučyni maje sens stvaryć asobny rasiejskamoŭny telekanał u miežach polskaha telebačańnia. Novaja prahrama — heta tak zvanaja «raźviedka bojem».
— Pra što budzie novaja prahrama?
— Jana budzie raspaviadać pra padziei ŭ rehijonie byłoha SSSR. Heta pakul tolki sproba, pašyreńnie našaj prahramnaj sietki. Nam važna, jak na jaje adreahujuć hledačy.
— Tut abaviazkova źjaviacca mierkavańni, što my nie zmožam kankuravać z rasiejskimi telekanałami.
— A my i nie musim kankuravać. My nie jość častkaju Rasiei, u šmat jakich spravach možam mieć inšy pohlad, čym navat niedziaržaŭnyja miedyi, jakija viaščajuć ułasna z Rasiei. Pryncypova prytrymlivajučysia biełaruskaj movy, my taksama nie možam rabić vyhlad, što ŭ Biełarusi bolšaść nie razumieje pa-rasiejsku. Heta ŭsio adno što chavać hałavu ŭ piasok.
— Praciŭniki rasiejskaj movy na «Biełsacie» rasceńvajuć hety krok jak sprobu zapeŭnić sabie finansavańnie.
— Viadoma, što na rasiejskajmoŭnyja ŚMI siońnia praściej znajści sponsaraŭ. Bo na hetaj movie razmaŭlaje ceły rehijon. U toj ža čas ja zaŭsiody imknusia pierakanać našych jeŭrapiejskich partnioraŭ, što biełaruskaja mova — taksama vielmi važnaja, nadzvyčaj kaštoŭnaja dla isnavańnia biełaruskaj nacyi. Ale kali my jak telekanał prymiem hanarovuju śmierć z pryčyny adsutnaści finansavańnia, dumaju, prajhrajuć usie, u tym liku biełaruskija patryjoty.
— U internet-kamientarach ludzi pišuć, što hatovyja tałakoj padtrymać «Biełsat» i što zusim nieabaviazkova pierachodzić na rasiejskuju movu, kab atrymać finansavańnie.
— Telekanał, jaki trymaje vysokuju jakaść, pieradaje praz spadarožnik, isnuje va ŭsich sacyjalnych sietkach, da taho ž maje internet-staronku ŭ čatyroch moŭnych viersijach, — vielmi darahi prajekt i vysiłkaŭ tałaki tut, chutčej za ŭsio, nie chopić. Ale my źbirajemsia raspačać kraŭdfandynh, dla hetaha akurat stvarajem fundacyju.
