Vysokapastaŭleny vietkaŭski milicyjant siarod nočy zajšoŭ u dom miascovaha žychara pravieryć dakumienty.
4 červienia ŭ sietcy źjaviłasia videa pad nazvaj «Nočnoj dozor. nač. ROVD h. Vietka połniejšij biespriedieł». Videa na svaim youtube-kanale apublikavaŭ karystalnik ponteley pomozov (Siarhiej Pomazaŭ), paviedamlaje «Biełsat».
Na videazapisie bačna, što pieršy namieśnik kiraŭnika adździaleńnia ŭnutranych spravaŭ Vietkaŭskaha rajvykankama Košman Alaksandr Uładzimiravič zajšoŭ u dom Pomazava.
Aŭtar videa emacyjna paprasiŭ u pravaachoŭnika rastłumačyć pryčyny poźniaha vizitu (amal apoŭnačy). Vysokapastaŭleny vietkaŭski milicyjant patłumačyŭ, što «dźviery ŭ domie byli adčynienyja», i jon nadumaŭ zajści i pravieryć dakumienty.
«Vy što ad mianie chočacie? Vy ŭnočy pryjšli da mianie i chodzicie svaimi brudnymi botami pa maich dyvanach. Ja vam zaraz rachunak vystaŭlu», — aburaŭsia mužčyna.
Praz 10 chvilinaŭ svarki milicyjant vyjšaŭ z doma, tak i nie ŭbačyŭšy dakumientaŭ. «Ja da vas pryjedu», — skazaŭ milicyjantu ŭ kancy vizitu aŭtar videa.
Sioleta 9-ha krasavika pačałasia historyja supraćstajańnia Siarhieja Pomazava, žychara vioski Pychań, pad Homielem, i supracoŭnikaŭ śpiecpadraździaleńnia darožna-patrulnaj słužby «Strała» Ministerstva ŭnutranych spravaŭ Biełarusi. Pavodle słovaŭ Siarhieja, supracoŭniki DAI biez papiaredžańnia zajechali ŭ dvor mužčyny i patrabavali pakazać pravy i dakumienty na aŭtamabil.
