Mastak Alaksiej Panciuk-Žukoŭski prapanavaŭ na vystavu siem svaich rabot. Siarod ich trypcich «Maja Biełaruś. Na skryžavańni stahodździaŭ», u centry jakoha namalavany Alaksandr i Mikałaj Łukašenki. Ale ekśpiertnaja rada nie ŭchvaliła pakaz hetaha tvora dla šyrokaj publiki.
7 červienia ŭ staličnym Pałacy mastactva adkryjecca vystava «Psichałohija ładu». «Faktyčna, heta vystava partretaŭ, — kaža staršynia Biełaruskaha sajuza mastakoŭ Ryhor Sitnica. — Na takija prajekty zaŭždy dasyłajuć nieimavierna šmat tvoraŭ. Siarod ich jość i tyja, jakija nielha pakazvać pa mastackich vartaściach — jany samatužnyja, samadziejnyja». Dla adboru lepšych tvoraŭ była stvorana ekśpiertnaja rada. Pa słovach Sitnicy, u jaje skład uvajšło kala piatnaccaci čałaviek - členy prezidyuma Sajuza mastakoŭ, a taksama kiraŭniki tvorčych siekcyj.
Alaksiej Panciuk-Žukoŭski, jaki apošnija try dziesiacihodździ vykładaje malunak, žyvapis i kampazicyju ŭ Respublikanskaj himnazii-kaledžy imia Achremčyka, prapanavaŭ na vystavu siem svaich tvoraŭ. Pa słovach mastaka, heta partrety Uładzimira Mulavina, Uładzimira Karatkieviča, Maksima Bahdanoviča, Vasila Bykava, a taksama trypcich «Maja Biełaruś. Na skryžavańni stahodździaŭ». U jaho levaj častcy namalavany Piatro Mašeraŭ, u pravaj — vialiki kniaź, a potym karol litoŭski Mindoŭh, u centry — Alaksandr Łukašenka z synam Mikałajem. Ale ekśpiertnaja rada pryniała na vystavu tolki partrety Bahdanoviča i Bykava.
U Panciuka-Žukoŭskaha hetaje rašeńnie vyklikała abureńnie: «Mnie ničoha nie kazali pra tvorčyja, mastackija aśpiekty. Jak napisany pracy, dzie pamyłki, što vypravić, kab ich palepšyć. Zapytvalisia: a pracu bačyli źvierchu? Chto tabie dazvoliŭ malavać pieršuju asobu ŭ dziaržavie? Ty narodny mastak, tabie zamovili hetuju pracu?»
Ale Ryhor Sitnica poŭnaściu admaŭlaje hetyja abvinavačvańni. Pavodle jaho słoŭ, «narakać, što tam jość palityčny abo asabisty čyńnik nie vypadaje». Kiraŭnik Sajuza mastakoŭ nie viedaje, «chto musić aficyjna dazvalać pakaz lubych tvoraŭ».
Jon bačyć tolki tvorčuju pryčynu dla admovy i dadaje: «Adchilaŭ nie staršynia sajuza, nie jahony namieśnik, a kalehijalny orhan, pradstaŭniki jakoha ŭbačyli svaju pryčynu».
U jakaści adnoj z kankretnych pretenzij mastak pryvodzić prykład ź Mindoŭham:
«Źviarnicie ŭvahu, jon u łatach XVI stahodździa! Ja kazaŭ aŭtaru: ty pamyliŭsia hadoŭ na trysta-čatyrysta (Mindoŭh byŭ zabity ŭ 1263 hodzie. Ale jamu što łaty Juryja Radziviła, što łaty Mindoŭha — usio adnolkava. Nakolki ja viedaju, Panciuk-Žukoŭski — amatar takich partretaŭ. Ciapier jon budzie trubić pra zabaronu, što jamu miž inšym i treba».
Trypcich «Maja Biełaruś. Na skryžavańni stahodździaŭ »byŭ stvorany jašče ŭ 2014 hodzie. Alaksiej Panciuk-Žukoŭski vykłaŭ hety tvor na svajoj staroncy «Ukantakcie». Jak patłumačyŭ mastak TUT.BY, jon uziaŭ try viechi biełaruskaj historyi: «Pieršy etap — stanaŭleńnie biełaruskaha naroda ź Mindoŭham. Druhi — stanaŭleńnie sacyjalistyčnaj Biełarusi, źviazanaje ź imiem Mašerava (choć jon i pravodziŭ rusifikacyju i zakryvaŭ biełaruskija škoły)».
Na pytańnie, čamu ŭ centry pracy namalavany dziejny prezident, Panciuk-Žukoŭski adkazvaje svaim pytańniem: «A kaho vy b chacieli bačyć u siaredniaj častcy? Paźniaka? Hryba? Kiebiča? Jakuju palityčnuju asobu, jakaja b abjadnoŭvała nas usich, jakaja maje vahu na siońniašni dzień?» Mastak stavicca da kiraŭnika dziaržavy supiarečliva, ale pierakanany, što lepšaha hieroja dla siaredniaj častcy trypcicha nie znajści.
«Ja niekalki razoŭ pisaŭ Alaksandru Ryhoraviču listy pra biełaruskaść, pra los biełaruskaj movy, — kaža mastak. — Siońnia pa telebačańni vy ŭžo bačycie biełaruskuju rekłamu. Moža, tut jość dola i majho ŭpłyvu».
Na pytańnie TUT.BY, čamu na karcinie namalavany syn dziejnaha prezidenta, mastak kaža, što heta nie Mikałaj, a «mastacki vobraz maładoj Biełarusi».
