U Biełarusi zatrymany bajec MMA Murad Amryjeŭ, jaki 6 červienia źbieh z budynka transpartnaj prakuratury ŭ Bransku, dzie jaho sprabavali zatrymać čačenskija siłaviki. Pra heta paviedamiŭ kiraŭnik Kamiteta pa praduchileńni katavańniaŭ Ihar Kalapin.
Pa słovach Kalapina, Amryjeva kala apoŭnačy zatrymali pamiežniki ŭ horadzie Dobruš Homielskaj vobłaści. Dniom 8 červienia jaho pieraviazuć pad kanvojem u Homiel.
Bajec MMA Murad Amryjeŭ źjechaŭ z Rasii ŭ 2013 hodzie — paśla taho, jak jaho, pa słovach pravaabaroncaŭ, vykrali i katavali palicyjanty ŭ Čačni. Siłaviki sprabavali damahčysia ad jaho pakazańniaŭ na brata, jakoha niejki vysokapastaŭleny čačenski palicejski ličyć arhanizataram zamachu na siabie.
4 červienia 2017 hoda Amryjeva zatrymali na miažy Rasii i Ukrainy - jon jechaŭ u Maskvu pa novuju vizu. Akazałasia, što jon znachodzicca ŭ fiederalnym vyšuku za vykarystańnie padroblenych dakumientaŭ; pa dadzienych Kamiteta pa praduchileńni katavańniaŭ, padstavaj dla hetaha stała pamyłka druku ŭ jaho pašparcie.
6 červienia Amryjeva farmalna vyzvalili i pavieźli na dopyt u budynak branskaj transpartnaj prakuratury. Kala budynka sabralisia supracoŭniki AMAP, a ŭnutr zajšli dva čačenskija apieratyŭniki, jakija sabralisia etapavać Amryjeva ŭ Čačniu. Pa słovach jaho advakataŭ, spartsmienu ŭdałosia skarystacca «mituśnioj», vybiehčy z budynka i źjechać na mašynie siabroŭ, jakija padjechali da budynka. Dzie jon znachodziŭsia paśla hetaha, było nieviadoma.
