Mocny ziemlatrus adbyŭsia ŭ Ehiejskim mory niepadalok ad zachodniaha ŭźbiarežža Turcyi i hrečaskaj vyspy Lesbas. Strasieńnie hleby adčuli taksama žychary Stambuła i Afin, piša VVS.
Fota: Manolis Lagoutaris
Pavodle danych Hieałahičnaj słužby ZŠA, epicentr ziemlatrusu mahnitudaj 6,3 znachodziŭsia za 5 kiłamietraŭ na poŭdzień ad hrečaskaha horada Płamary, raźmieščanaha na paŭdniovym uskrajku Lesbasa.
Jak paviedamiŭ mer Płamary, u centry horada byli paškodžanyja niekatoryja budynki. Danych ab achviarach i paciarpiełych pakul nie pastupała.
Hrecyja i Turcyja raźmiaščajucca na linijach hieałahičnych razłomaŭ, i ziemlatrusy ŭ hetych miescach niaredkija.
«Strasieńnie było i sapraŭdy mocnym. Usio ŭ majoj klinicy pačało dzika treścisia i razhojdvacca, my z pacyjentami adrazu vyskačyli na vulicu, — raspavioŭ ahienctvu Rejter Dydem Erys, 50-hadovy zubny lekar u prybiarežnym tureckim horadzie Iźmiry. — Nam, žycharam Iźmira, zusim nie pryvykać da ziemlatrusaŭ, ale na hety raz usio było pa-inšamu. Ja jašče padumaŭ, što, mahčyma, ciapier my zahiniem».
Karystalniki sacyjalnych sietak, jakija znachodziacca ŭ zachodniaj Turcyi, paviedamlajuć ab mocnym i praciahłym dryhacieńni ziamli pad saboj i nastupnych turškach, jakija adčuvalisia pa ŭsim rehijonie Ehiejskaha mora.
«U nastupnyja hadziny, dni i tydni nam daviadziecca źviedać šerah paŭtornych šturškoŭ», — kaža kiraŭnik absiervatoryi Kandyli ŭ Stambule Chaluk Ozienier.
Pavodle papiarednich danych, u dvuch haradach na hrečaskaj vyśpie Lesbas byli adznačanyja paškodžańni ŭ rajonach staroj zabudovy. Niekalki miascovych žycharoŭ paskardzilisia na nievialikija traŭmy.
