U raźviedvalnych słužbach Małdovy ličać, što piaciora vysłanych z krainy rasijskich dypłamataŭ byli špijonami i ažyćciaŭlali viarboŭku bajevikoŭ dla ŭdziełu ŭ bajavych dziejańniach na ŭschodzie Ukrainy. Pra heta paviedamlaje Reuters, spasyłajučysia na krynicu ŭ małdaŭskim ŭradzie i jašče na dźvie krynicy ŭ dypłamatyčnych kołach, piša UNIAN.
Reuters
Jak śćviardžajuć daśviedčanyja krynicy, piaciarych dypłamataŭ vysłali z-za imaviernych adnosin da aficeraŭ, jakija vykonvali zadačy pad prykryćciom rasijskaha raźviedvalnaha ŭpraŭleńnia Hienieralnaha štaba Uzbrojenych sił. U toj ža čas, krynicy nie paviedamili, jakim čynam rasijskija dypłamaty vierbavali bajevikoŭ i jak šmat zavierbavanych. Da taho ž, Reuters adznačaje, što nie moža samastojna pravieryć śćviardžeńni ab dziejnaści rasijskich dypłamataŭ.
Taksama skazana, što ŭ rasijskim ministerstvie zamiežnych spraŭ admovilisia kamientavać toje, što adbyłosia.
Małdaŭskaja vyviedka śćviardžaje, što bajevikoŭ, jakich vierbavali ŭ Hahauzii, spačatku adpraŭlali ŭ łahier vajennaj padrychtoŭki ŭ Rastoŭskaj vobłaści na poŭdni Rasii. Krynicy nie padali bolš infarmacyi ab miescy znachodžańnia łahiera.
Jak viadoma, Rasija vykarystoŭvaje minimum dva łahiery ŭ Rastoŭskaj vobłaści dla padrychtoŭki dobraachvotnikaŭ dla ŭdziełu ŭ bajavych dziejańniach na ŭschodzie Ukrainy. Try krynicy skazali, što niekatoraja infarmacyja ab hahauzach, jakija vajujuć na baku bajevikoŭ, była pradastaŭlenaja małdaŭskim uładam Słužbaj biaśpieki Ukrainy. Atrymaŭšy infarmacyju ad SBU, małdaŭskija ŭłady atrymali mahčymaść adsočvać, aryštoŭvać i dapytvać bajevikoŭ z Hahauzii.
