Mabyć, u žyćci kožnaha byvajuć pieryjady, kali žudasna nie chočacca iści na pracu i adčuvaješ tolki adno žadańnie — zabicca z hałavoj pad koŭdru, zapluščyć vočy i pra ŭsio zabycca. Pryčynaj tamu zusim nie abaviazkova pavinna być lanota. Značna čaściej kraduć enierhiju stres na pracy, pastajannaja śpieška, drennyja adnosiny ŭ kalektyvie, mobinh z boku načalstva abo kaleh, adsutnaść maralnych i materyjalnych stymułaŭ da taho, kab z addačaj pracavać. Takija faktary — surjoznyja padstavy dla markoty. A kali padobny stan doŭžycca daŭžej za dva tydni, to jon niebiaśpiečny apatyjaj — ciažkim psichičnym rasstrojstvam, jakoje praciakaje chranična i navat moža pryvieści da invalidnaści, piša DW.
«U adnych niežadańnie iści ŭ ofis moža paŭstać rezka, u adzin momant, u inšych niepryjaznaść da pracy nazapašvajecca hadami. U lubym vypadku, nie pazajzdrościš tym, chto ŭžo ŭ paniadziełak pačynaje ličyć, kolki dzion zastałosia da vychadnych, a ŭ kancy adpačynku trasiecca ad strachu pry adnoj dumcy pra sustreču z kalehami i načalstvam. Kancentrujučysia na niehatyvie, my pazbaŭlajem siabie enierhii. Admoŭnyja emocyi imhnienna źmianiajuć bijachimičny skład kryvi, vyklikajuć stomlenaść, adymajuć u čałavieka siły. Heta vielmi niebiaśpiečna», — pieraścierahaje bierlinski kansultant pa pytańniach karjery Jens Janaš i daje šerah parad, jak źmianić situacyju da lepšaha.
Pracujcie z poŭnaj addačaj
Usprymajcie svaju pracu nie jak katarhu abo srodak dasiahnieńnia mety, a jak tvorčy praces. Čym by vy ni zajmalisia, rabicie heta sumlenna. Tak možna zachapicca navat tym, što vam napačatku nie daspadoby. Padychodźcie da luboj pracy z usioj surjoznaściu — i vaša dziejnaść nabudzie sens. Pabolš ekśpierymientujcie i znachodzicie takija sposaby pracavać, jakija dazvolać vam damahčysia najlepšych vynikaŭ. Pry hetym nie zabyvajciesia siabie chvalić. Čym vyšejšaja ŭ vas samaacenka, tym ščaśliviejšym vy budziecie siabie adčuvać.
Pašyrajcie svaje haryzonty
Rehularna zapisvajciesia na kursy pavyšeńnia kvalifikacyi, starajciesia pierajmać dośvied bolš paśpiachovych kaleh, zajmajciesia samaadukacyjaj. Pastajannaje imknieńnie da raźvićcia nie tolki matyvuje, ale i spryjaje asobasnamu rostu i ŭdałaj karjery.
Vučyciesia kiravać svaim časam
Pravilny tajm-mieniedžmient — heta šlach da pośpiechu, ale jak składana jaho pieraadoleć! Abaviazkova viadzicie dziełavy kalandar-pamiatku. Jon dapamoža vam efiektyŭna vykarystoŭvać svoj asabisty i pracoŭny čas, zrobić žyćcio plonnym i kamfortnym. Paradak u žyćci robić čałavieka bolš ščaślivym.
Raskryvajcie svaje talenty
Starajciesia brać na siabie zadačy, pry vykanańni jakich vy zmožacie z maksimalnaj paŭnatoj raskryć svaje zdolnaści i talenty. Udzieł u padobnych prajektach budzie prynosić sapraŭdnaje zadavalnieńnie, i vy adčujecie siabie na vyšyni, bo zrazumiejecie, što ad vas šmat što zaležyć. Pośpiech i pryznańnie ŭ kalektyvie zabiaśpiečanyja.
Atrymlivajcie zadavalnieńnie ŭ šlachu na pracu
Jak pakazvajuć navukovyja daśledavańni, čałaviek, jaki dabirajecca na pracu i z pracy dadomu ŭ hadzinu pik na asabistym ci hramadskim transparcie, adčuvaje navat bolš stresu, čym lotčyk-źniščalnik padčas bajavoha palotu. Tamu pasprabujcie zrabić tak, kab daroha była pryjemnaj. Kali vy jeździcie ŭ elektryčcy, čytajcie cikavuju knihu ci hazietu, a kali vy za rulom, słuchajcie pryjemnuju muzyku ci aŭdyjoknižki.
Abaviazkova zajmajciesia sportam
Zaniatki sportam zdymajuć napružańnie i spryjajuć utvareńniu harmonaŭ ščaścia. Tamu kožny dzień dobra pačynać z zaradki. Nu, a kali vy, da taho ž, budziecie rehularna pravodzić i bolš surjoznyja treniroŭki- - skažam, trojčy ŭ tydzień ździajśniać paŭhadzinnyja prabiežki, — to dobry nastroj i pryliŭ enierhii vam harantavanyja.
Trymajciesia dalej ad niepryjemnych ludziej
Starajciesia jak maha mienš mieć znosiny ź niervovymi ludźmi, jakija prymajuć usio ŭ štyki, vyklikajuć admoŭnyja emocyi i psujuć navakolnym nastroj. Lepš znachodzicca ŭ kampanii viasiołych, žyćciaradasnych, pazityŭnych, adekvatnych ludziej, jakija ŭmiejuć vysłuchać i zrazumieć surazmoŭcu, śvieciacca luboŭju i harmonijaj. Pahutaryš z takim čałaviekam — i markocie kaniec.
Ale naohuł, dla taho kab źmianić situacyju, treba spačatku ŭ joj razabracca, padkreślivaje Jens Janaš.. Sam jon vykarystoŭvaje tut pryncyp analizu pa hrafičnaj tablicy, jakaja składajecca ź viertykalnaj i haryzantalnaj škał.
Viertykalnaja škała — časovaja. Na joj pa paradku paznačanyja asobnyja hady vašaj pracy ŭ dadzienaj kampanii. A na haryzantalnaj adznačajecca ŭzrovień vašaj matyvacyi na praciahu hetych hadoŭ: minimalnaja adznaka — 1 bał, maksimalnaja — 10 bałaŭ.
«Prasačyŭšy dynamiku raźvićcia vašaj matyvacyi, pasprabujcie znajści adkazy na takija pytańni: ci źmianiałasia na praciahu minułych hadoŭ pavodziny kaleh u adnosinach da vas i pa jakich pryčynach? Jakuju mietamarfozu źviedali vašy adnosiny z načalstvam i čamu? Jakija vam abiacali pierśpiektyvy, kali vy pačynali pracavać u hetaj firmie, i ci strymanyja hetyja abiacańni? Ci atrymlivali vy zadavalnieńnie ad pracy na starcie i jak iduć spravy ciapier? Ci jość šancy źmianić situacyju da lepšaha i, kali tak, to jakija? Razabraŭšysia z usim hetym, vy zrazumiejecie, ci varta praciahvać pracavać u dadzienaj kampanii, abo ŭsio-taki lepš pašukać inšy varyjant», — ličyć Janaš.
