Staršynia Partyi BNF Lavon Barščeŭski źviarnuŭsia ź listom da staršyni Kamitetu dziaržaŭnaj biaśpieki Respubliki Biełaruś Zajcava Vadzima. Pryčyna zvarotu — sytuacyja, jakaja skłałasia vakoł siabra Partyi BNF Alaksandra Miecha, jaki vyłučajecca ŭ jakaści kandydata ŭ deputaty pałaty pradstaŭnikoŭ Respubliki Biełaruś pa Kobrynskaj vybarčaj akruzie № 12.
Nahadajem, što Alaksandr Miech byŭ zvolnieny z Upraŭleńnia mahistralnych hazaprovadaŭ z pasady inžynera pa ekspluatacyi hazavych sietak nizkaha cisku. Farmalnaj padstavaj zvalnieńnia pasłužyła skančeńnie termina pracoŭnaha kantraktu. Ale ž sa słoŭ načalnika UMH Hałaška Uładzimiera Michajłaviča i načalnika Kobrynskaha rajonnaha adździaleńnia KDB Baśko Andreja Antonaviča, zvalnieńnie Alaksandra Miecha naŭprost źviazana ź jahonym udziełam u vybarach deputataŭ Pałaty pradstaŭnikoŭ Nacyjanalnaha schodu Respubliki Biełaruś.
«Takim čynam supracoŭnik Vašaj ustanovy Baśko A. A., niepasredna parušajučy zakanadaŭstva Biełarusi, akazvaŭ cisk na Alaksandra Miecha, pahražajučy zvalnieńniem z pracy za sprobu realizavać svajo kanstytucyjnaje prava i vyłučycca ŭ jakaści kandydata ŭ deputaty Pałaty pradstaŭnikoŭ Respubliki Biełaruś, — piša Lavon Barščeŭski. — Hety fakt paćviardžajecca ŭ tym liku i aŭdyjozapisam razmovy, jakuju zrabiŭ Alaksandr Miech. Uličvajučy, što paśla razmovy z vyšejadznačanymi słužbovymi asobami, spadar Miech byŭ zvolnieny, možna ličyć, što pamiž zvalnieńniem i razmovaj z Vašym supracoŭnikam jość pramaja suviaź. Sychodziačy z hetaha, ja rablu vysnovu, što Alaksandr Miech byŭ zvolnieny za realizacyju svajho zakonnaha prava i hramadzka‑palityčnuju pazycyju, i da hetaha prykraha zvalnieńnia majuć dačynieńnie i supracoŭniki KDB Respubliki Biełaruś».
Na svoj zvarot u UKDB pa Bieraściejskaj vobłaści Alaksandr Miech atrymaŭ adkaz, ź jakoha bačna, što abłasnoje ŭpraŭleńnie KDB śviadoma pakryvaje svaich supracoŭnikaŭ, u dziejańniach jakich možna nazirać prykmiety kryminalnaha złačynstva, praduhledžanaha art. 191 KK Respubliki Biełaruś.
«Na žal, orhany KDB ź instytutu abarony nacyjanalnych intaresaŭ biełaruskaha narodu pieratvarylisia ŭ orhan palityčnaha cisku i represijaŭ u dačynieńni da aktyvistaŭ demakratyčnych arhanizacyj i partyj, — śćviardžaje ŭ liście Lavon Barščeŭski. — U parušeńnie zakanadaŭstva Respubliki Biełaruś adbyvajecca cisk i zapałochvańnie studentaŭ, sproby šantažu i schileńnia da supracoŭnictva. Orhany dziaržaŭnaj biaśpieki časta vykarystoŭvajuć i kryminalny pieraśled u dačynieńni da apanentaŭ siońniašniaha palityčnaha režymu.
Ja vielmi spadziajusia, što ŭ KDB vyśpiavaje razumieńnie nieabchodnaści viartańnia da zakonnaści i abarony sapraŭdnych intaresaŭ hramadztva, i tamu vy daście naležnuju acenku dziejańniam supracoŭnikaŭ UKDB pa Bieraściejskaj vobłaści, jakija majuć dačynieńnie da niezakonnaha pieraśledu i zvalnieńnia Aleksandra Miecha».
Lavon Barščeŭski zapatrabavaŭ pravieści słužbovuju pravierku ŭ dačynieńni da načalnika UKDB pa Kobrynskamu rajonu Bieraściejskaj vobłaści Baśko Andreja Antonaviča, dać acenku jaho dziejańniam u dačynieńni da siabra Partyi BNF Alaksandra Miecha i pryniać miery pa ŭznaŭleńni pravoŭ Alaksandra Miecha.
