Navat začynieny ralet moža bahata raskazać pra haspadara |
Kramka Alesia Taŭstyki mieścicca na ždanovickim radyjorynku ŭ čaćviortym šerahu pad numaram 1068 (niedzie voś tut). Što praŭda, nieŭzabavie na hetym miescy pastaviać čarhovy handlovy kompleks, a radyjohandlaroŭ pierasielać u inšaje miesca. Kudy — jany j sami da kanca nia viedajuć. Zrešty, znajści jaje budzie niaciažka — niezvyčajnaha handlara viedajuć tut usie.
(Milinkievič nie pradajecca) |
Biełaruskamoŭnaść — pravierana na praktycy — važny biznes‑čyńnik. Nia prosta srodak znosinaŭ, a peŭnaja rekamendacyja čałavieku. Tamu j skłałasia vakoł kramki koła stałych klijentaŭ. Tyja j nie chavajuć, što pry inšych roŭnych — biełaruščyna pieravažvaje.
A mikrafony zamiest «raz, raz» možna praviarać słovami z samatužnaj azbuki, naprykład — «rovar, rohat» |
Prychilna staviacca da biełaruskamoŭnaha handlara i susiedzi pa rynku. Chto‑nichto ź ich sam sprabuje razmaŭlać pa‑biełarusku. Byvaje, ź inšaha kirmašovaha kanca chto pryjdzie ŭziać čytva pa‑biełarusku, pazyčyć padrunik movy. A ŭ haspadara zaŭždy napahatovie la hadžetaŭ stos hazetaŭ. Na ŭra iduć nat staryja numary NN.
Zvyčajny asartyment niezvyčajnaj kramki |
Specyjalna zachodziacca j prafesijnyja skandalisty. Upeŭnienaj chadoj kročać tyja da kramki j usčynajuć lamant: «Ja na vašaj ukrainskaj ničevo nie panimaju», «Nadajeła eta biełaruskaja mova», «Havary pa‑narmalnamu».
Tavar u Taŭstyki nie ekskluziŭny — kali ŭžo hetak niaścierpnyja zvonkaje «dz» i hustoje «čaho». Ad ža ž redka zdarałasia tak, kab jaki pakupnik čaho nie zrazumieŭ. Tavary z łaŭki Taŭstyki jość u chatach i prostych pracaŭnikoŭ, i milicejskich čynoŭ. Skul viedaje? U takoj niezvyčajnaj kramcy niejak samo vychodzić, što pakupki biez razmovy nie byvaje.