Pamiatajecie, kali pačaŭsia chapun pa hetak zvanaj «Spravie patryjotaŭ», Biełteleradyjokampanija vypuściła film «Bieły Lehijon čornych duš»?
Čytajcie: Patok nianaviści ŭ ananimnym filmie BT: «Bieły lehijon» pryraŭniali da «Isłamskaj dziaržavy», biełaruskuju simvoliku źviazali z nacyzmam
Nienazvanyja aŭtary «rasśledavańnia» čaho tolki nie naplali: vusnami «ekśpierta» Andreja Miacielskaha abvinavacili lehijanieraŭ u nacyźmie, vydali zdahadki ananimnaj «maci» za dokaz prysutnaści lehijanieraŭ na vajnie ŭ Danbasie, pryčapili chłopcam suviazi z «Isłamskaj dziaržavaj» i Talibanam, «raskryli» płany lehijanieraŭ učynić terakty ŭ Maskvie, abvinavacili ŭ padrychtoŭcy terarystaŭ-śmiarotnikaŭ dla vybuchaŭ u Minsku…
Słovam, patok nianaviści i chłuśni byŭ takim, što ŭ pravavoj dziaržavie aŭtaraŭ takoha filma, imavierna, pryciahnuli b da adkaznaści za raspalvańnie varožaści i paklop.
Asabliva aktualna heta ciapier — kali ŭsie fihuranty «Spravy patryjotaŭ» vyjšli ź izalataraŭ.
Tamu «Naša Niva» adrasavała pres-słužbie Biełteleradyjokampanii pytańnie, ci varta hramadstvu čakać abviaržeńnia i vybačeńniaŭ za toj prapahandyscki film.
«Pakolki vašaje pytańnie davoli źmiastoŭnaje, abjomnaje, i jano adnosicca, jak mnie zdajecca, nie tolki da pres-słužby Biełteleradyjokampanii, ja b paraiła vam źviarnucca piśmova da Biełteleradyjokampanii, kab atrymać adkaz na ŭsie vašyja pytańni», — tak nam adkazali.
«Naša Niva» źvierniecca da BT ź piśmovym zapytam.