U Minsku prajšoŭ tradycyjny parad 3 Lipienia. Jak i ŭ minułyja hady, jon ujaŭlaŭ saboj hibryd maskoŭskich paradaŭ i BSSRaŭskich «šeściaŭ pracoŭnych» pierad trybunaj z kiraŭnictvam.
Pierad trybunaj z kiraŭnictvam krainy pramaršyravali vajskoŭcy — u tym liku desantniki z susiedniaj dziaržavy, prajechała technika. Nad horadam pralacieli samaloty i viertaloty.
Paśla na mašynach pravieźli ŭzory pradukcyi — u tym liku batony kiłbasy «Biełdziaržcharčprama» i pralnyja mašyny «Atłanta».
Traktary MTZ vykanali balet, a salisty i chor — himn «Žyvie Biełaruś» na słovy Uładzimira Niaklajeva, u varyjancie dzie słova «Žyvie» zamieniena na «Słaŭsia».
Maładyja fizkulturniki zładzili karotkaje himnastyčnaje šou.
Usio heta było vytrymana ŭ patetyčnym styli, z pretenzijaj na masavaść i ŭračystaść, choć i biez paŭnočnakarejskaha fanatyzmu.
Alaksandr Łukašenka vystupaŭ pa-rusku. Ruskaja zastajecca i movaj vajskovaha rytuału: pa-rusku vitaŭ paradnyja raźliki ministr abarony.
Viadučy dziaržaŭnaha telebačańnia taksama kamientavaŭ parad pa-rusku. «Eto było potriasajuŝie, prosto nieimovierno, nieopisujemo!» — zachłynalisia ŭ epitetach jany, choć hledačy nie pabačyli ničoha takoha, čaho b nie bačyli ŭ minułyja hady.
Alaksandr Łukašenka prysutničaŭ u mundziry hałoŭnakamandujučaha, pravaruč jaho stajaŭ hienieralitet — Raŭkoŭ, Zaś, Vakulčyk, Šunievič, Kaniuk, Naskievič dy inšyja, levaruč — cyvilnaje kiraŭnictva krainy: Kabiakoŭ, Miaśnikovič, Andrejčanka, Kačanava, Mikłaševič, Anfimaŭ, Sukała, Kałaŭr, Šorac.
Z uzhorkaŭ vakoł praśpiekta Pieramožcaŭ za paradam i šou nazirali niekalki dziasiatkaŭ tysiač hledačoŭ.
«Razam z brackaj Rasijaj my abaraniajem miežy Sajuznaj dziaržavy, jakuju my stvarajem, — adznačyŭ u svajoj pramovie Alaksandr Łukašenka. — Na šlach militaryzacyi ŭstupili krainy Jeŭropy. Jany ŭciahvajucca ŭ honku ŭzbrajeńniaŭ i vajennyja pryhatavańni. Złučanyja Štaty Amieryki razhortvajuć tut, la našych miežaŭ, sistemu supraćrakietnaj abarony i ŭdaskanalvajuć svoj jadzierny patencyjał. Naš adkaz — sučasnaja biełaruskaja armija. Jana ŭvieś čas madernizujecca, mabilnaja, navučanaja i ŭzbrojena», — skazaŭ Łukašenka.
Nahadajem, što 3 lipienia 1944 hoda savieckaja armija vyzvaliła Minsk ad nacystaŭ. Niezaležnaść Biełarusi była ŭpieršyniu abvieščana 25 sakavika 1918 hoda. 27 lipienia 1990 hoda ŭ pracesie raspadu SSSR była pryniataja Dekłaracyja ab dziaržaŭnym suvierenitecie. A 25 žniŭnia 1991 hoda joj byŭ nadadzieny status kanstytucyjnaha akta.
25 Sakavika tradycyjna adznačajecca jak Dzień Voli, 3 Lipienia staŭ dziaržaŭnym śviatam z 1996 hoda pad nazvaj Dzień Respubliki (Dzień Niezaležnaści).
