Barysu i Hańnie Kurapackim* ź Minskaj vobłaści šmat chto zajzdrościŭ: cudoŭnyja dzieci, jakija chutka mielisia skončyć škołu. Muž z žonkaj tolki-tolki pierajechali ŭ dom sa śviežym ramontam, što dastaŭsia Barysu ad baćkoŭ. Abodva upeŭniena ruchalisia pa słužbovaj leśvicy…
Kali haspadar niečakana zvolniŭsia ź lubimaj pracy, dla ŭsioj siamji heta stała šokam. Što adbyłosia, čamu jon pryniaŭ takoje rašeńnie? Dziasiatki pytańniaŭ niepakoili Hannu. Barys ža tolki admoŭčvaŭsia. Adnojčy jon usio-tki paviedamiŭ, što znajšoŭ inšuju, bolš cikavuju i apłatnuju pracu, i jak tolki adpačnie ad papiaredniaj — adrazu ž vyjdzie na novuju. Išoŭ čas, a ŭsia praca kiraŭnika siamiejstva abmiažoŭvałasia siadzieńniem kala televizara dy na prysiadzibnym učastku. Viadoma ž, za 15 hadoŭ šlubu pamiž mužam i žonkaj skłalisia daviernyja adnosiny, Hanna sprabavała padtrymlivać muža, ale paśla taho, jak jaje zarobkaŭ stała ź ciažkaściu chapać na ŭtrymańnie siamji i vypłatu kredytaŭ, uziatych na kuplu aŭtamabilaŭ, heta zrabiłasia niepasilnym vyprabavańniem.
Praz dva miesiacy paśla zvalnieńnia muža jaje čakaŭ dadatkovy ŭdar: Hanna atrymała kopiju pazoŭnaj zajavy z Vyjaznoha traciejskaha suda ad Viktara, byłoha kalehi muža. Dakumient śviedčyŭ, što Barys vinien vypłacić Viktaru pazyku.
Viktar mierkavaŭ atrymać srodki za košt domu, jaki sam haspadar pad hetu metu i zakłaŭ. Hanna čuła pra takoje ŭpieršyniu, chacia heta majomaść ličyłasia sumiesna nažytaj, i muž byŭ abaviazany ŭvieści žonku ŭ kurs spravy. Ale Barys navat zabaraniŭ joj prysutničać na zakrytym pasiedžańni traciejskaha suda. Stała jasna — muž niešta chavaje. Nie dabiŭšysia adkazaŭ ad Barysa, Hanna vyrašyła šukać ich u byłych kaleh muža.
Ilustracyjnaje fota.
Što ž adbyłosia? Jak vyjaviłasia, na praciahu niekalkich hadoŭ Barys mieŭ intymnuju suviaź ź Viktaram i jašče adnym sa svaich padnačalenych pa pracy, Ramanam. Apošni byŭ maładym śpiecyjalistam i takim čynam vyrašyŭ chutčej prasoŭvacca pa karjernaj leśvicy. Mienavita pačućci da maładoha supracoŭnika vymusili Barysa zaleźci ŭ daŭhi i zakłaści dom: toj chłopiec šmat vandravaŭ, kłapaciŭsia pra źniešni vyhlad i maryŭ pra ŭłasny transpart. Na heta ŭsio byli patrebnyja hrošy.
Zvalniacca ž pryjšłosia paśla taho, jak kachankaŭ na pracoŭnym miescy ŭ niedvuchsensoŭnaj situacyi zaśpieŭ Viktar — treci ŭdzielnik trykutnika. Nie strymaŭšysia ad reŭnaści, jon zakaciŭ skandał, infarmacyja pra jaki chutka dalacieła da vyšejšaha kiraŭnictva. U vyniku ŭsie troje mužčyn, žadajučy schavać infarmacyju pra svaju seksualnuju aryjentacyju ŭ tajamnicy, adnačasova padali zajavy na zvalnieńnie pa ŭłasnaj inicyjatyvie.
Vynik hetaj historyi, na žal, sumny dla siamji Kurapackich: Hanna z Barysam rasstalisia, dzieci stracili aficyjnaha baćku, a dom byŭ dobraachvotna pieraaformleny Barysam na Viktara, kab pahasić zapazyčanaść.
*Imiony i proźviščy ŭsich hierojaŭ źmienienyja.
Kamientaryi psichołahaŭ:
Alena Dubovik, dyrektar Centra paśpiachovych adnosin:
Alena Dubovik, fota: psycenter.by.
— Vidavočna, toje, što adbyłosia — heta nastupstvy kryzisu, jaki pačaŭsia ŭ hetaj siamji daŭno. Tam nie było atmaśfiery uzajemadavieru, i nivodzin z partnioraŭ ničoha nie rabiŭ dla jaje stvareńnia. Atrymany vynik kaža pra toje, što ŭ žyćci hetaj pary daŭno nazapašvałasia svabodnaja enierhija, jakaja nijakim čynam nie realizoŭvałasia. Tut užo niavažna, jakaja jana — homa-, bi- ci hieteraseksualnaja.
Lubaja zdrada — heta katastrofa, navat kali pra jaje nichto nie daviedaŭsia. Zvyčajna, kali pra padman stanovicca viadoma žančynam, jany nie razumiejuć, jak tak atrymałasia: partnior ža byŭ taki dobry! Za hetym dobrym jany nie bačyli druhuju častku, toje, što kachany znachodziŭsia nie ŭ harmonii z saboj.
Ludzi puścili svajo žyćcio na samaciok. Ciapier treba pryniać toje, što zdaryłasia, i pačać, narešcie, kiravać losam. Tolki razabraŭšysia ŭ svaich adnosinach dy pačućciach, možna niejak vybudoŭvać dyjałoh ź dziećmi. U dadzienym vypadku ciahnuć koŭdru na siabie, kažučy, što baćka drenny, ni ŭ jakim razie nielha. Vy chočacie raskazać małym, što muž — hiej i zdradziŭ siamji, kab być ščyrymi? Ale ž vy nie byli ščyrymi navat sam-nasam. Nielha pierakładać adkaznaść za svaje ŭčynki na dziaciej. Adnosiny mužčyny i žančyny nie pavinny tyčycca baćkoŭskaj kamunikacyi. Ale ŭ nas zvyčajna tak: pakul my kachajem adzin adnaho — my dobryja baćki, jak tolki pierastajom — abvinavačvajem partniora va ŭsich hrachach i svarymsia. Pakutujuć ad hetaha dzieci, rabić tak nielha.
Raman Kručkoŭ, siamiejny psichołah:
Raman Kručkoŭ, fota: zviazda.by.
— Pamyłkova ličyć, što hiei ci leśbijanki abaviazkova buduć mieć adnapołyja adnosiny. Pa roznych pryčynach jany stvarajuć i tradycyjnyja siemji, naradžajuć dziaciej… Čamu? Usio dosyć indyvidualna: heta moža być niežadańnie traŭmiravać baćkoŭ, cisk hramadstva i hetak dalej. U asnoŭnym — praz presinh asiarodździa, što farmuje kaštoŭnaści, madeli, ustanoŭki i padšturchoŭvaje da peŭnaha vybaru. Na fonie hetaha cisku čałaviek moža zataić u dušy svaju homaseksualnaść i sprabavać budavać narmalnuju, pa mierkach hramadstva, siamju. Tym nie mienš, kali-niebudź, ź vialikaj dolaj imaviernaści, jon zrobić toje, što budzie vyhladać zdradaj. Davier zhubicca i, adpaviedna, u adnosinach nastupić kryzis. Hieteraseksualny partnior budzie pieražyvać takuju zdradu macniej, bo razam ź joj vykryvajecca praciahły padman.
Raskazvać dzieciam pra prablemy siamji možna, ale z ahladkaj na ŭzrost. Taksama treba ŭličvać horad, dzie ŭsio adbyłosia: kali jon maleńki, jość niebiaśpieka raspaŭsiudžvańnia plotak, jakija pastaviać kryž na karjery i budučyni dziaciej, baćki buduć imknucca schavać pryčyny razvodu. Chacia, z punktu hledžańnia adkaznaści pierad dziećmi, zaŭsiody lepš adkrycca: tajna nie zmoža nie ŭpłyvać na dziaciej. Biełyja plamy ŭ bijahrafii zdolnyja zhulać z naščadkam drenny žart: jon byŭ vycisnuty na pieryfieryju pryniaćcia rašeńniaŭ i žyŭ u infarmacyjnym vakuumie. Nie vyklučana, što ŭ budučyni jon nie zmoža adkazać na niejkija važnyja dla siabie pytańni.
