«My rady apynucca na voli, ale našaje sapraŭdnaje vyzvaleńnie jašče nie nastupiła. My prymajem našaje vyzvaleńnie jak faktar spraviadlivaści, ale nikoli nie pryznavali siabie vinavatymi i ličym, što byli asudžanyja niezakonna pa palityčnych matyvach», — havorycca ŭ zajavie.
Pry hetym, jak zaznačajecca ŭ dakumiencie, «jašče rana havaryć ab tym, što ŭ Biełarusi bolš niama palitźniavolenych».
«10 našych tavaryšaŭ: Alaksiej Bondar, Arciom Dubski, Michaił Kryvaŭ, Michaił Paškievič, Alaksandr Stralcoŭ, Alaksandr Čarnyšoŭ, Taćciana Ciškievič, Michaił Subač, Pavieł Vinahradaŭ, Maksim Dašuk — udzielniki zimovych akcyj pratestu pradprymalnikaŭ — pryhavorany da roznych terminaŭ abmiežavania voli. Biez dazvołu milicyi im možna znachodzicca tolki doma i pa miescy pracy. Im zabaroniena vyjazdžać za miažu, a sa svajho horada jany mohuć vyjechać tolki pa dazvole ŭładaŭ, paśla 19 hadzin jany abaviazanyja znachodzicca pa miescy rehistracyi. Za malejšaje parušeńnie hetaha režymu ich u luby momant mohuć kinuć za kraty. My ličym, što hetyja ludzi taksama znachodziacca ŭ statusie palitźniavolenych», — havorycca ŭ zajavie.
Taksama byłyja palitźniavolenyja zajaŭlajuć, što vybarčaja kampanija, što prachodzić u krainie, nie źjaŭlajecca sumlennaj i adkrytaj.
«Jak možna ab hetym havaryć, kali i my, i inšyja lidery apazicyi — Michaił Marynič, Mikałaj Statkievič, Pavieł Sieviaryniec, Artur Fińkievič, Dźmitryj Daškievič, Mikałaj Aŭtuchovič, Andrej Klimaŭ, a taksama mnohija inšyja biełaruskija viaźni sumleńnia paražanyja ŭ pravach i nie mohuć udzielničać u vybarach u jakaści kandydataŭ. Biez poŭnaha adnaŭleńnia pravoŭ palitźniavolenych nielha havaryć, što vykanana adna z 12 prapanoŭ Jeŭrapiejskaha sajuza pa demakratyzacyi Biełarusi», — ličać A.Kazulin, A.Kim i S.Parsiukievič.
«My ćviorda pierakananyja, što vyzvaleńnie niekalkich palitźniavolenych siońnia — heta nie harantyja taho, što zaŭtra na ich miescy nie apynucca inšyja. Nieabchodna dabivacca instytucyjanalnych źmien u biełaruskim zakanadaŭstvie, realnaha raździaleńnia sudovaj i vykanaŭčaj uładaŭ, poŭnaj reabilitacyi palitźniavolenych i praduchileńnia padobnaj praktyki ŭ budučyni», — zaznačajuć byłyja palitźniavolenyja.
