U šerahu rehijanalnych haziet i partałaŭ Litvy źjavilisia abjavy, u jakich za kiłahram sušanych kapialušykaŭ atrutnych hryboŭ prapanujuć 150 jeŭra. Sam skupščyk kaža, što pierapradaje muchamory za miažu, dzie jany zapatrabavanyja praz svaje hajučyja ŭłaścivaści, a voś fitaterapieŭt, farmaceŭt Virhilijus Skirkiavičus adznačaje, što muchamor vałodaje halucynahiennymi ŭłaścivaściami.
Pradajuć za miažu
«Pa ŭsioj Litvie skuplajem sušanyja čyrvonyja muchamory. Kiłahram — 150 jeŭra», — źjaviłasia abjava ŭ adnoj z rajonnych haziet u Łaździjaj. Aŭtar abjavy Arnoldas Skirymas u intervju DELFI kaža, što hryby pierapradaje. Jon vykazaŭ zadavalnieńnie tym, što ŭ Litvie jon adzin skuplaje niebiaśpiečnyja hryby, tamu kankurencyi niama, adnak i ludziej, jakija b źbirali padobny typ hryboŭ, taksama nie chapaje. Tak što hety zarobak jamu składana nazvać załatoj žyłaj.
«Košt vyznačany taki, kab ludzi cikavilisia, telefanavali. U minułym hodzie cana była nižejšaj, adnak kali ludzi pačali źbirać, sušyć, to zrazumieli, što heta surjoznaja praca, i nie takaja ŭžo prostaja, jak moža padacca», — kaža jon. Pa słovach pradprymalnika, mnohaje zaležyć ad umoŭ nadvorja, hrybny ci niehrybny hod i h.d. Jon kaža, što nabytyja hryby pierapradaje za miažoj: «Samyja vialikija rynki — aŭstryjski, niamiecki i amierykanski. Skažam, u Aŭstryi jość ludzi abo siemji, cełyja siamiejnyja pradpryjemstvy, dzie ciažka adroźnić, ci źjaŭlajucca jany jurydyčnaj asobaj, ci prosta heta hrupa ludziej, zaniatych u nietradycyjnaj miedycynie, jakija i skuplajuć syravinu».
Vielmi niebiaśpiečny hryb
Tym časam šmathadovy prezident asacyjacyi hrybavodaŭ i pierapracoŭščykaŭ Hintaŭtas Milus nie čuŭ, kab chto-niebudź u Litvie skuplaŭ muchamory. «Ja pamiataju, u dziacinstvie muchamory my źbirali dla adpužvańnia much, kali nie chapała chimikataŭ. Niejkim čynam hryby vyciskali i palivali ścieny, ale ŭ astatnim ja nie čuŭ, kab chtości ich skuplaŭ», — skazaŭ jon.
H. Milusa skupka muchamoraŭ vielmi ździviła, tamu što heta vielmi atrutny hryb. «Ja čuŭ pra jaho hajučyja jakaści, ale ja nie mahu skazać kankretna. Napeŭna, kožnuju atrutu razumna možna vykarystoŭvać, kab atrymać niešta karysnaje, ale ja liču, što heta vielmi składanaja reč. Navat dotyk da muchamora moža mieć surjoznyja nastupstvy, treba doŭha myć ruki», — adznačaje ekśpiert.
Fitaterapieŭt, farmaceŭt Virhinijus Skmrkiavičus pryznajecca: pieršaja dumka, jakaja da jaho pryjšła, kali jon pačuŭ ab skupcy čyrvonych muchamoraŭ, ich halucynahienny efiekt. «Hety hryb vyklikaje halucynacyi. I tolki paśla hetaha my možam havaryć pra jaho hajučyja ŭłaścivaści. Takim čynam, usio heta dziŭna. U tych, chto skuplaje, mohuć być inšyja tłumačeńni, ja nie chaču nikoha padazravać. Choć mnie cikava, navošta kuplać, bo heta nie hrupa navukoŭcaŭ, jakaja skuplaje hryby, kab rabić niejkija daśledavańni. Niechta heta prosta tak prydumaŭ. Ale ja nie chaču nikoha padazravać», — paŭtaryŭ jon.
