Viačasłaŭ Kasinieraŭ źviarnuŭsia ŭ sud Centralnaha rajona Minska z pozvaj ab abaronie hodnaści i kampiensacyi maralnaj škody. Adkazčykami zajaŭlenyja «Ahulnanacyjanalnaje telebačańnie» i viadučaja jaho teleprahrammy «Našyja naviny» Kaciaryna Tyškievič, Ministerstva ŭnutrannych spraŭ i načalnik minskaj milicyi Alaksandr Barsukoŭ, paviedamlaje spring96.org.
Nahodaj staŭ videasiužet «Chulihan-anarchist, jaki apahaniŭ skulpturu haradavoha ŭ Minsku, zastaniecca ŭ SIZA da rašeńnia suda», u jakim, jak ličyć Viačasłaŭ Kasinieraŭ, viadziecca havorka pra jaho. Bo mienavita jon nakinuŭ na šyju palicejskamu-haradavomu piatlu, znachodziŭsia ŭ SIZA padčas vychadu prahramy i byŭ pryznany palityčnym źniavolenym šeraham biełaruskich pravaabarončych arhanizacyj.
U telesiužecie situacyju kamientavaŭ načalnik HUUS Minharvykankama Alaksandr Barsukoŭ, jaki miž inšym adznačyŭ:
«Heta prosty chulihan, na jakim klajma niama dzie stavić, pa vialikim rachunku.
I niekatoryja, tak zvanyja, pravaabarončyja arhanizacyi sprabujuć ź jaho zrabić niejkuju achviaru. Jakaja achviara?! Try razy pryciahvaŭsia da kryminalnaj adkaznaści za chulihanstva, try razy pryciahvaŭsia da kryminalnaj adkaznaści i za psavańnie majomaści. Nu, heta ŭžo niejak charaktaryzuje, napeŭna, vyšejpakazanaha hramadzianina».
Viačasłaŭ Kasinieraŭ ličyć, što skazanaje Barsukovym A. nie adpaviadaje rečaisnaści, bo ŭ momant vychadu telepieradačy jon tolki adnojčy pryciahvaŭsia da kryminalnaj adkaznaści.
Viačasłaŭ Kasinieraŭ padkreślivaje, što vykazvańni televiadučaj Kaciaryny Tyškievič i načalnika HUUS, jakija nie adpaviadajuć rečaisnaści, byli zroblenyja publična ŭ efiry telekanała, čym nanieśli jamu maralnyja pakuty, jakija vyjavilisia ŭ pačućci hłybokaj abrazy i prynižeńnia, a taksama dyskredytacyi ŭ vačach hramadstva jaho imia.
Jon prosić sud Centralnaha rajona Minska pryznać źviestki, što byli raspaŭsiudžanyja ŭ telesiužecie, nie adpaviednymi rečaisnaści, abaviazać adkazčykaŭ — ANT, MUS, Kaciarynu Tyškievič i Alaksandra Barsukova — vydalić źviestki pra toje, što zajaŭnik «try razy pryciahvaŭsia da kryminalnaj adkaznaści za chulihanstva, try razy pryciahvaŭsia da kryminalnaj adkaznaści i za psavańnie majomaści», a taksama abvierhnuć ich šlacham abviaščeńnia ŭ prahramie «Našy naviny» na kanale ANT.
Akramia taho, spahnać na karyść Viačasłava Kasinierava z adkazčykaŭ 3 000 rubloŭ u jakaści kampiensacyi maralnaj škody.
Nahadajem, Viačasłavu Kasinieravu było vystaŭlena abvinavačvańnie ŭ ździajśnieńni złačynstva pa častcy 1 artykuła 339 Kryminalnaha kodeksa (chulihanstva) za praviedzieny im 12 sakavika 2017 h. kala budynku MUS pierformans, padčas jakoha jon nakinuŭ piatlu na ŭstalavanuju tam statuju palicejskaha-haradavoha, vykazaŭšy takim čynam svoj pratest suprać milicejskaha samavolstva i pieraśledu aktyvistaŭ anarchisckaha ruchu za ŭdzieł u mirnych akcyjach pratestu. Sud Maskoŭskaha rajona pakaraŭ aktyvista štrafam u piać bazavych vieličyń.
