3 žniŭnia ŭ sudzie Pieršamajskaha rajonu Mienska pačaŭsia praces nad videaaperataram telekanału «Biełsat» Alaksandram Barazienkam. Vioŭ pasiedžańnie sudździa Dźmitry Cykał.
Jak nahadvaje Biełaruskaja asacyjacyja žurnalistaŭ (BAŽ), adździeł baraćby z ekanamičnymi złačynstvami RUUS Pieršamajskaha rajonu Miensku skłaŭ pratakoł na Alaksandra Barazienku za «parušeńnie aŭtarskich, sumiežnych i patentnych pravoŭ» (artykuł 9.21 KaAP). Jamu pahražaje štraf ad 460 da 1150 rubloŭ.
Takim čynam, pavodle BAŽ, pravaachoŭniki pastavili za metu zrabić Barazienku adkaznym u spravie ab parušeńni aŭtarskich pravoŭ, źviazanych z brendam «Biełsat». Sam aperatar ličyć, što spravu zaviali, kab skanfiskavać techniku, na jakoj jon pracuje.Sioleta ŭ sakaviku dziela tłumačeńniaŭ u jakaści śviedki milicyja zabrała ź mienskaha ofisu «Biełsatu» inšaha aperatara — Alaksandra Lubienčuka. U jaho skanfiskavali asabistuju techniku, a z pamiaškańnia vynieśli ŭsie kamputary. Alaksandra Barazienku dapytali ŭ hetaj spravie ŭ izalatary na zavułku Akreścina, dzie jon znachodziŭsia paśla akcyi na Dzień Voli.
Na prośbu advakatki Łarysy Atamančuk da materyjałaŭ spravy byŭ dałučany pratakoł asabistaha vobšuku Barazienki, składzieny 25 sakavika. Tam pieraličanaje abstalavańnie, na jakim pracavaŭ aperatar.
Taksama advakat zajaviła chadajnictva dałučyć zaklučeńnie specyjalista, ź jakoha vynikaje, što 2 žniŭnia Alaksandra Barazienku dapytali na palihrafie. Jon śćviardžaŭ, što padčas akcyi ŭ Dzień Voli lahatypu telekanału «Biełsat» na abstalavańni nie było. Sudździa chadajnictva nie zadavoliŭ.
Nastupnaje sudovaje pasiedžańnie adbudziecca 9 žniŭnia. Na hetuju datu sudździa pastanaviŭ vyklikać paniatych, jakija prysutničali, kali na Akreścina ŭ Alaksandra Barazienki milicyjanty zabirali techniku.
Sprava vakoł tavarnaha znaku «Biełsat» ciahniecca amal 5 hadoŭ. Pavodle ŭładalnika firmy «BIEŁSATplus» Andreja Bielakova, telekanał parušaje intaresy jahonaha biznesu. Pradprymalnik źviarnuŭsia ŭ Viarchoŭny sud, ale toj nie zadavoliŭ jahonych patrabavańniaŭ. Tady jon pasprabavaŭ zabaranić telekanału vykarystoŭvać tavarny znak «Biełsat TV» («Belsat TV»). Ale Viarchoŭny sud paličyŭ patrabavańni nieabhruntavanymi.
Paŭtorny razhlad spravy inicyjavaŭ prezydyjum Viarchoŭnaha sudu, a spravu razhladaŭ inšy skład sudździaŭ. 4 vieraśnia 2014 hodu sud zadavoliŭ pazoŭ Bielakova i zabaraniŭ telekanału vykarystoŭvać handlovy znak «Biełsat TV» pry tranślacyi na terytoryju Biełarusi dy na internet-staroncy.
