11 pravaabarončych arhanizacyj vystupili z zajavaj, u jakoj patrabujuć ad biełaruskich uładaŭ spynić kryminalny pieraśled kiraŭnikoŭ prafsajuzu REP Hienadzia Fiadyniča i Ihara Komlika.
U suviazi z utrymańniem Ihara Komlika ŭ izalacyi pravaabaroncy ličać jaho palitviaźniem i patrabujuć nieadkładnaha vyzvaleńnia.
Pavodle pravaabaroncaŭ, raspačataja suprać prafsajuznych lideraŭ kryminalnaja sprava palityčna matyvavanaja, źviazanaja z aktyŭnaj prafsajuznaj dziejnaściu i mirnym ažyćciaŭleńniem prava na svabodu asacyjacyjaŭ.
«Adnačasova patrabujem ad uładaŭ Biełarusi spynić cisk na niezaležny prafsajuzny ruch i zaklikajem admovicca ad niepravamiernaha ŭmiašańnia ŭ jahonuju dziejnaść. Zaklikajem biełaruskuju hramadzkaść i mižnarodnuju supolnaść užyć usie mahčymyja srodki palityčnaha i pravavoha cisku na ŭrad Biełarusi ŭ metach vyzvaleńnia Ihara Komlika», — havorycca ŭ zajavie.
2 žniŭnia ŭ miežach kryminalnaj spravy, uzbudžanaj pavodle č. 2 art. 243 Kryminalnaha kodeksu Respubliki Biełaruś — «uchileńnie ad vypłaty sum padatkaŭ, zboraŭ u asabliva bujnym pamiery» — byŭ zatrymany staršynia prafsajuzu REP Hienadź Fiadynič. Paźniej jaho adpuścili. Artykuł, jaki inkryminujecca Hienadziu Fiadyniču, praduhledžvaje pazbaŭleńnie voli na termin da siami hadoŭ z kanfiskacyjaj majomaści.
Kryminalnaja sprava taksama ŭzbudžanaja suprać hałoŭnaha buchhaltara prafsajuzu REP Ihara Komlika. Supracoŭniki Departamentu finansavych raśśledavańniaŭ Kamitetu dziaržkantrolu praviali pieratrusy doma ŭ Ihara Komlika, Hienadzia Fiadyniča i byłoj redaktarki prafsajuznaha sajtu Natalli Pičužkinaj, a taksama ŭ ofisie prafsajuzu REP i centralnym ofisie Biełaruskaha niezaležnaha prafsajuzu ŭ Salihorsku. Kanfiskavanyja kamputarnaja technika i finansavyja dakumenty.
Pravaabaroncy adznačyli, što analahičnaja kryminalnaja sprava była ŭzbudžanaja ŭ 2011 hodzie ŭ dačynieńni da staršyni Pravaabarončaha centru «Viasna» Alesia Bialackaha.
«Kryminalnuju spravu ŭ dačynieńni da kiraŭnikoŭ prafsajuzu REP Hienadzia Fiadyniča i Ihara Komlika my adnaznačna ŭsprymajem jak ataku na niezaležny prafsajuzny ruch, źviazanuju ź ich hramadzkaj aktyŭnaściu i imknieńniem uładaŭ zapałochać arhanizacyi hramadzianskaj supolnaści ŭ Biełarusi», — adznačajuć aŭtary zajavy.
Prafsajuz REP sabraŭ bolš za 45 tysiač podpisaŭ suprać dekretu «pra darmajedaŭ» i aktyŭna ŭdzielničaŭ u «Maršach niedarmajedaŭ». Pravavyja inspektary prafsajuzu akazvali pravavuju dapamohu hramadzianam.
