"U BATE šansaŭ na pośpiech niama, ale Liha čempijonaŭ budzie dobraj škołaj jak dla kłuba, tak i dla ŭsiaho biełaruskaha futboła. Heta dazvolić prasunucca napierad" — tak prakamientavaŭ vyniki losavańnia hrupavoha etapa ŁČ hałoŭny trenier nacyjanalnaj zbornaj Biełarusi pa futbole Biernd Štanhie ŭ intervju BiełaPAN.
"My vielmi hanarymsia tym, što budziem hulać suprać madrydskaha "Reała", turynskaha "Juvientusa" i pieciarburhskaha "Zienita". Dla nas heta histaryčny momant.
My ŭbačym hetyja kamandy ŭ siabie doma, i vielmi važna, kab na futboł pryjšło jak maha bolš hledačoŭ. Balelščyki roznych kłubaŭ — MTZ-RIPA, "Darydy", "Dynama" — pavinny zabyć pra kankurencyju i pieražyvać za BATE — tak, jak pieražyvali za našu zbornuju na matčy z Arhiencinaj", — zajaviŭ B.Štanhie.
Jak zaznačyŭ trenier, BATE damohsia vydatnaha pośpiechu, upieršyniu trapiŭšy ŭ hrupavy turnir Lihi čempijonaŭ. "Matč u adkaz z "Leŭski" trymaŭ u napružańni da apošniaj chviliny, i hałoŭnym byŭ vynik, a nie vidoviščnaść futboła", — skazaŭ B.Štanhie.
Pavodle jaho słoŭ, BATE ŭ hrupie budzie vielmi ciažka."U nacyjanalnaj zbornaj my možam hulać na bolš vysokim uzroŭźni, bo majem hulcoŭ, jakija vystupajuć u viadučych jeŭrapiejskich kłubach. Ale my pavinny prychodzić na stadyjon i pieražyvać za našu kamandu", — padkreśliŭ trenier.