14 žniŭnia ŭ Minsku byŭ zatrymany rasijski psichołah Michaił Kazłoŭ. Jaho zatrymali ŭviečary padčas praviadzieńnia treninhu nakont rostu asoby «Abudžeńnie» na vulicy Varanianskaha.
Infarmacyju ab zatrymańni rasijskaha psichołaha paćvierdziŭ aficyjny pradstaŭnik HUUS Minharvykankama Alaksandr Łastoŭski.
«Jon zatrymany i znachodzicca ŭ Kastryčnickim RUUS. Pravodzicca pravierka — pastupiła zajava, dzie jaho vinavaciać u machlarstvie», — paviedamili ŭ milicyi.
«Učora ŭviečary na «102» patelefanavała žančyna, jakaja paviedamiła, što ŭ chodzie treninhu ŭ jaje dačynieńni byli ździejśnieny abraźlivyja dziejańni, jakija prynižajuć honar i hodnaść. Ad jaje taksama pastupiła zajava, što hramadzianin Kazłoŭ ašukanskim šlacham zavałodaŭ jaje hrašovymi srodkami pamieram 250 dalaraŭ ZŠA. Anałahičnaja infarmacyja pastupiła adnačasova i na telefon davieru HUUS Minharvykankama», - raspaviali ŭ milicyi.
Na treninh «zavitali» supracoŭniki padraździaleńniaŭ narkakantrolu stalicy i patrulna-pastavoj słužby Kastryčnickaha RUUS Minska. Udzielniki treninhu byli dastaŭleny ŭ RUUS dla razboru, i paśla apytańnia byli adpuščanyja.
«Hramadzianin Kazłoŭ znachodzicca ŭ rajonnym upraŭleńni. U dačynieńni da jaho pravodzicca pravierka pa fakcie zajavy, a taksama pa fakcie zakonnaści praviadzieńnia treninhu», — dadali ŭ milicyi.
***
Michaił Kazłoŭ — rasijski psichołah, viadučy treninhaŭ asobasnaha rostu i niekalkich realici-šou. Udzielničaŭ u teleprajekcie «Dom-2». Nieadnarazova vystupaŭ na rasijskich televizijnych kanałach.
«Praź mianie prajšło bolš za 45 000 klijentaŭ i bolš za 50 kampanij. Ja źjaŭlajusia ekśpiertam-psichołaham Hramadskaj Pałaty RF, Pieršaha telekanała, telekanała «Rasija» i TNT. U mianie bolš za 200 TB- i radyjovystupaŭ», — tak siabie acharaktaryzavaŭ u rekłamie svaich treninhaŭ Michaił Kazłoŭ.
U Minsku Kazłoŭ časta pravodziŭ treninhi. Naprykład, na «Abudžeńni» abiacaŭ «3 dni nieimaviernych emocyj, adkryćciaŭ, praryvaŭ» i «treniroŭku bolš efiektyŭnych madelaŭ pavodzinaŭ i myśleńnia» za paru sotniaŭ dalaraŭ. Na staroncy prajekta ŭ sacsietkach pakazana, nibyta treninh prajšli bolš za 10 tysiač čałaviek i navat pryvodzicca statystyka pra rost dachodaŭ i pośpiechach u asabistym žyćci vypusknikoŭ praz paŭhoda.
