Sud u Biškieku 16 žniŭnia abviaściŭ prysud hałoŭnamu apazycyjaneru Kyrhyzstanu Amurbieku Tekiebajevu: jon atrymaŭ 8 hadoŭ turmy z kanfiskacyjaj majomaści i zabaronu na try hady zajmacca palityčnaj dziejnaściu.
Tekiebajeŭ — lider apazycyjnaj partyi Kyrhyzstanu «Ata Miekien». Jon byŭ aryštavany ŭ aeraporcie Biškieka ŭ lutym 2017 paśla svarki z prezydentam krainy Ałmaźbiekam Atambajevym i adpraŭleny ŭ SIZA słužby dziaržbiaśpieki krainy, dzie jamu pradjavili abvinavačvańni ŭ karupcyi i machlarstvie. Pry hetym da leta 2016 hodu Tekiebajeŭ byŭ sajuźnikam prezydenta Kyrhyzstanu, ale pierajšoŭ u apazycyju paśla pryniaćcia papravak u Kanstytucyju krainy, jakija značna pašyryli paŭnamoctvy premjer-ministra.
Tekiebajeŭ taksama zaklikaŭ pačać praceduru impičmentu prezydenta i patrabavaŭ pačać antykarupcyjnaje raśśledavańnie suprać kiraŭnika dziaržavy i členaŭ jaho siamji.
Abvinavačańni, pradjaŭlenyja palityku, byli zasnavanyja na pakazańniach rasiejskaha pradprymalnika, byłoha deputata Dziarždumy ad KPRF Leanida Majeŭskaha. Tekiebajeŭ nibyta atrymaŭ ad jaho ŭ 2010 hodzie adzin miljon dalaraŭ dla spryjańnia ŭ pakupcy akcyjaŭ kampanii «Miehakom» (sotavy aperatar Kyrhyzstanu).
Prychilniki palityka śćviardžajuć, što Tekiebajeva pieraśledujuć pavodle palityčnych matyvaŭ.
Prezydenckija vybary ŭ Kyrhyzstanie pryznačany na 19 listapada. Tekiebajeŭ planavaŭ vyłučyć na ich svaju kandydaturu, ale prysud faktyčna stavić kryž na jaho palityčnaj karjery.
Prychilniki Tekiebajeva źbirajucca pravieści ŭviečary ŭ Biškieku masavyja akcyi pratestu suprać vyniesienaha jamu prysudu.
