1 vieraśnia ŭ Minsku, kala budynka pa vulicy Kirava, 21, navučency byłoha Nacyjanalnaha dziaržaŭnaha humanitarnaha liceja imia Jakuba Kołasa razam z baćkami i nastaŭnikami praviali liniejku, pryśviečanuju Dniu viedaŭ.
Na praciahu 11 hadoŭ navučalnaja ŭstanova raźmiaščałasia ŭ hetym budynku, jaki ŭ 2003 hodzie ŭłady pieradali sudu Centralnaha rajona stalicy.
Adkryvajučy liniejku, dyrektar liceja Uładzimir Kołas pavinšavaŭ prysutnych z Dniom viedaŭ i vykazaŭ padziaku ŭsim siabram liceja ŭ Biełarusi i za jaje miežami. Pavodle jaho słoŭ, hety navučalny hod źjaŭlajecca hodam śviatkavańnia 20‑hodździa liceja, adkrytaha ŭ 1989 hodzie pry Biełaruskim humanitarnym adukacyjna‑kulturnym centry. «Užo ŭ vieraśni my pačniem padrychtoŭku da hetaha śviata. Jak zvyčajna, nas čakajuć cikavyja padarožžy ŭ śviet viedaŭ, sustrečy z vydatnymi ludźmi i znajomstva ź jeŭrapiejskaj historyka‑kulturnaj i pryrodnaj spadčynaj», — skazaŭ U.Kołas.
Namieśnik dyrektara liceja Lavon Barščeŭski zaznačyŭ, što liceisty pavinny pamiatać pra svoj dom pa vulicy Kirava, 21.
«Bo ŭ hetym histaryčnym budynku z kanca XIX stahodździa zaŭsiody raźmiaščalisia navučalnyja ŭstanovy. I my ŭpeŭnieny, što z časam licej vierniecca ŭ svoj dom», — skazaŭ Ł.Barščeŭski.Jon zaklikaŭ vykładčykaŭ i liceistaŭ vysoka nieści marku navučalnaj ustanovy, jakaja vyłučajecca prychilnaściu da nacyjanalnyj tradycyj i vysokim uzroŭniem viedaŭ.
Prysutnyja vykanali himn «Haŭdeamus ihitur» i ŭskłali kvietki da ścien budynka.
Nahadajem, za 19 hadoŭ isnavańnia heta ŭstanova prajšła šlach ad niadzielnaj navučalnaj ustanovy pazakłasnaha typu da Nacyjanalnaha dziaržaŭnaha humanitarnaha liceja imia Jakuba Kołasa Ministerstva adukacyi ź filijałami va ŭsich abłaściach krainy. Viasnoj 2003 hoda licej byŭ zakryty ŭładami. Niahledziačy na heta, navučalnaja ŭstanova praciahvaje pracavać u nieaficyjnym statusie Biełaruskaha humanitarnaha liceja. Navučency samastojna vyvučajuć kurs siaredniaj škoły i zdajuć ekzamieny eksternam.
