U Homielskaj vobłaści z pačatku 2008 hoda na prymusovaje lačeńnie ad ałkahalizmu va ŭmovach lačebna‑pracoŭnaha prafiłaktoryja (ŁPP) nakiravany 104 žycharki rehijonu.
Za anałahičny pieryjad minułaha hoda sudy nakiravali na lačeńnie 54 žančyn‑ałkaholikaŭ.
Jak paviedamiŭ BiełaPAN namieśnik načalnika ŭpraŭleńnia prafiłaktyki UUS Homielskaha abłvykankama Anatol Vasiljeŭ, za siem miesiacaŭ hetaha hoda pacyjentami ŁPP stali 498 žycharoŭ vobłaści. U orhanach achovy zdaroŭja na ŭliku znachodzicca 40,7 tys. ałkaholikaŭ, ź ich bolš za 13 tys. — na prafiłaktyčnym uliku, 27,5 tys. — na dyspansiernym.
«U metach prafiłaktyki pravaparušeńniaŭ asablivaja ŭvaha nadajecca ŭzajemadziejańniu z sudami pa praviadzieńni vyjaznych sudovych pasiadžeńniaŭ, na jakich prymajecca rašeńnie ab nakiravańni ŭ ŁPP asob, jakija złoŭžyvajuć śpirtnymi napojami, — zaznačyŭ A.Vasiljeŭ. — Hetaja forma raboty maje vialiki hramadski rezanans, asabliva ŭ sielskaj miascovaści, i źjaŭlajecca efiektyŭnaj mieraj uździejańnia ŭ dačynieńni da asob, schilnych da ŭčynieńnia pravaparušeńniaŭ».
Z pačatku hoda praviedziena 105 vyjaznych sudovych pasiadžeńniaŭ pa izalacyi ŭ ŁPP chraničnych ałkaholikaŭ. Razam z tym, pavodle infarmacyi ŭpraŭleńnia prafiłaktyki, u Jelskim, Lelčyckim i Śvietłahorskim rajonach rabota pa hetym kirunku słužbovaj dziejnaści naohuł nie ažyćciaŭlałasia, a ŭ Dobrušskim, Vietkaŭskim, Buda‑Kašaloŭskim, Žłobinskim i Rahačoŭskim rajonach praviedziena tolki pa dva pasiadžeńni. Pa piać vyjaznych pasiadžeńniaŭ praviali ŭ Mazyrskim, Čačerskim i Savieckim rajonie Homiela.
Pavodle źviestak upraŭleńnia prafiłaktyki, u 2007 hodzie 313 žycharoŭ Homielskaj vobłaści pamierli ad atručeńnia surahatnym ałkaholem.
