Kamanda Google zrabiła ŭsio, kab karystalniku kamputara nie było patreby vychodzić u off‑łajn. Pierapisvacca, čytać naviny, pieramaŭlacca, pisać błohi i dakumenty, majstravać trochmiernyja vyjavy, padarožničać pa planecie dy bahata čaho jašče možna nie vychodziačy z terytoryi Google'a.
Ukłaŭšy stolki siłaŭ u stvareńnie źmiestu, google'aŭcy zadumalisia pra formu. «My zrazumieli, što treba znoŭ vynajści braŭzer», — pryznaŭsia ŭ błohu kampanii vice‑prezydent pa raźvićci prahramnych praduktaŭ.
Zrešty, pieršyja čutki pra raspracoŭku Google'am braŭzeru papaŭźli jašče čatyry hady tamu. I voś učora ŭ aficyjnym błohu (i tut nie jak va ŭsich!) byŭ niečakana anansavany vychad pieršapačatkovaj versii Google Chrome — akurat siońnia, u aŭtorak 2 vieraśnia.
Pakul braŭzer nie źjaviŭsia dla ściahvańnia, google'aŭcy vypuścili 38‑staronkavy malavany komiks, jaki raspaviadaje pra jahonyja mahčymaści.
Admysłoŭcy prabiehlisia pa viasiołych karcinkach i zaintryhavali karystalnikaŭ. Pavodle ich vysnoŭ, Chrome zusim nia prosta braŭzer. Choć pa pieršym časie jon składzie kankurecyju Firefox'u i Internet Explorer'u, z zajaŭlenymi mahčymaściami jon moža nieŭzabavie zamachnucca i na… Windows.
Tym nia mienš, raspracoŭščyki paśpiašalisia zajavić, što pradukt budzie jašče syravatym, i zaklikali karystalnikaŭ dasyłać svaje zaŭvahi i prapanovy. Miarkujecca, što testavy peryjad moža zaciahnucca na try hady — da skančeńnia partnerskaje damovy z Firefox'am.
 Sajtu techcrunch.com udałosia zdabyć zdymki braŭzera Google Chrome. Jany byli skapijavanyja z gugłaŭskaj staronki braŭzera, jakaja była dastupnaja karotki čas |
