U Miensku 27 pradstaŭnikoŭ rymska-katalickaha parafii Śviatoha Jazepa pačali biesterminovy post za viartańnie viernikam budynkaŭ klaštara biernardynaŭ z kaściołam.
Ab hetym paviedamiła BiełaPAN siabra hramady Ivona Macukievič. Pa jaje słovach, z 30 žniŭnia ŭ akcyi za viartańnie śviatyni ŭdzielničajuć ludzi roznych uzrostaŭ, uzroŭnia adukacyi i prafiesij, uklučajučy 17-hadovych studentaŭ.
«Chtości ź ich pačaŭ čysty post i abmiežavaŭ siabie adnoj vadoj, niekatoryja zdavolvajucca chlebam i vadoj. Pryčym kožny z udzielnikaŭ akcyi abraŭ dla siabie vyznačany dzień pasta. Ja paščusia try dni na tydzień — u sieradu, piatnicu i subotu», — skazała I. Macukievič. Pa jaje słovach, hetaja achviara Bohu stanie dadatkam da nabaženstvaŭ za viartańnie śviatyni viernikam, jakija štodnia pravodziacca try z pałovaj hady pačynajučy z 19 sakavika 2005 hoda.
I. Macukievič źviarnułasia da ŭsich ludziej dobraj voli z prośbaj padtrymać siabraŭ hramady ŭ ich imknieńni viarnuć toje, što pa pravie naležyć viernikam.
Nahadajem, u 2007 hodzie pad zvarotam da kiraŭnika dziaržavy za viartańnie klaštara viernikam było sabrana bolš za 30 tysiač podpisaŭ. Akcyja pačałasia paśla taho, jak stała viadoma ab płanach Mienharvykankama pieradać budynki śviatyni inviestaram pad haściničny kompleks i abjekty handlova-bytavoha pryznačeńnia.
Klaštar byŭ kanfiskavany ŭ 1864 hodzie ŭładami Rasiejskaj impieryi paśla zdušeńnia paŭstańnia suprać caryzmu pad kiraŭnictvam Kastusia Kalinoŭskaha.
Jak stała viadoma BiełaPAN z kampietentnych krynic u Biełaruskaj rymska-katalickaj carkvie, 20 červienia ŭ Miensku na sustrečy z Alaksandram Łukašenkaj dziaržaŭny sakratar Papy Rymskaha Bieniedykta XVI kardynał Tarčyzia Biertone nie atrymaŭ stanoŭčaha adkazu na pytańnie ab viartańni viernikam budynkaŭ klaštaru biernardynaŭ z kaściołam.
