Siońnia ŭ Miensku pačynajucca Dni Eŭropy. Pry padtrymcy Eŭrakamisii, ich arhanizujuć dyplamatyčnyja misii krainaŭ Eŭrapiejskaha źviazu i krainaŭ-kandydataŭ na dałučeńnie da Źviazu Pačynajučy z 22 traŭnia, ciaham šaści dzion zapar u stalicy Biełarusi projdzie mnostva imprezaŭ.
Pakolki Aŭstryja -- ciapierašni staršynia ŭ Eŭraźviazie -- nia maje svajoj ambasady ŭ Biełarusi, jana daručyła pradstaŭlać ahulnaeŭrapejskija intaresy ŭ Miensku dyplamatam Łatvii. Ambasadar hetaj krainy Majra Mora padkreślivaje, što Dni Eŭropy – heta mahčymaść jašče raz zhadać i adznačyć, što biełarusy – eŭrapiejcy, chacia j admiežavanyja ciapier ad źjadnanaj Eŭropy:
(Mora: ) «Biełaruś maje niepasrednuju ahulnuju miažu z Eŭropaj. Tamu nadzvyčaj važna viedać svaich susiedziaŭ, a susiedziam budzie dadziena mahčymaść pakazać siabie. Heta tym bolš cikava, što ŭ nas byli ahulnyja momanty ŭ historyi».
Niekatoryja ludzi ŭ Biełarusi razvažajuć tak: z adnaho boku, Eŭraźviaz začyniaje dźviery dla niekatorych biełaruskich čynoŭnikaŭ, z łruhoha -- pravodzić mierapryjemstvy ŭ Biełarusi, da taho ž vydatkoŭvaje na ich eŭrapejskija hrošy. Ci niama tut niejkaj supiarečnaści?
Daradca ambasady Litvy ŭ Biełarusi Maryus Janukonis padkreślivaje, što Eŭraźviaz nie źbirajecca budavać ścianu dziela taho, kab adharadzicca ad Biełarusi:
(Janukonis:) «Supiarečnaściej tut niama, pakolki Eŭraźviaz zaŭždy padkreślivaje svajo žadańnie supracoŭničać jak maha bolš z hramadztvam, ź ludźmi Biełarusi. Dni Eŭropy jak raz na heta i nakiravanyja. Eŭraźviaz, kali uvodziŭ sankcyi albo prymaŭ niejkija inšyja rašeńni, zaŭždy adznačaŭ, što jon zastajecca adkrytym dla nasielnictva Biełarusi, ale nie dla asobnych čynoŭnikaŭ. Tamu što biełarusy heta --eŭrapiejcy».
Dni Eŭropy ŭ Biełarusi, jak žartujuć supracoŭniki ambasadaŭ, adnačasova pieratvarajucca i ŭ spabornictva dyplamataŭ, pakolki u miežach dzion niekatoryja krainy praviaduć svaje ŭłasnyja dni. Prykładam, švedy zaplanavali studenckuju kanferencyju, łatyšy pryvoziać u Miensk falkłorny ansambal «Vietach», baŭhary ładziać dyskateku, litoŭcy pravodziać u ambasadzie dzień adkrytych dźviarej dla biełaruskich studentaŭ, francuzy pakažuć ajčynnyja filmy, niemcy arhanizujuć futbolny matč i konkurs zaŭziataraŭ.
