U časie pres-turu delehacyja z rasiejskich rehijanalnych ŚMI naviedała nia tolki zvykłyja «Biełaruśkalij» i kałhas-majak u Snovie, ale i sumiesnaje biełaruska-niamieckaje pradpryjemstva «Chienkiel Baŭtechnik» u Zasłaŭi. Što ž tam takoje niemcy vykupili?
Sumiesnaje biełaruska-niamieckaje pradpryjemstva «Chienkiel Bautechnik», jakoje ŭvachodzić u hrupu kampanijaŭ Henkel, było stvoranaje ŭ 2004 hodzie. U vieraśni 2006 hodu ŭ Zasłaŭ, što pad Mienskam, SP raspačało ŭłasnuju vytvorčaść budaŭničych sumiesiaŭ na pabudavanym dziela hetych metaŭ zavodzie. Investycyi ŭ vytvorčaść pa stanie na 2007 hod skłali 6,5 młn eŭra.
U 2008-2009 prajekt «Zavod budaŭničych sumiesiaŭ Ceresit» atrymaje jašče 2 młn. eŭra. Prajektnaja mahutnaść zavodu ŭ Zasłaŭi składaje 100 tys.t., na taki pakazčyk pradpryjemstva planuje vyjści da 2010 hodu.
Pačynaŭ «Chienkiel Baŭtechnik» z šaści bazavych praduktaŭ, na siońnia jon prapanuje ŭvieś spektar budaŭničych sumiesiaŭ Henkel pad handlovymi markami Ceresit i Thomsit.
Horadu novaje pradpryjemstva pryniesła 150 dadatkovych pracoŭnych miescaŭ a taksama 250 młn rubloŭ na rekanstrukcyju miascovych daroh.
Plany kampanii ŭ Biełarusi nie abmiažoŭvajucca naładžvańniem ułasnaj vytvorčaści ŭ Zasłaŭi. Dva hady tamu kancern abvieściŭ pra plany investavać u raźvićcio vytvorčaści na bazie baranavickaha «Barchimu» $40 młn. Asnoŭnaj zadačaj biełaruska-niamieckaj kampanii źjaŭlajecca nasyčeńnie ŭnutranaha rynku budaŭničych materyjałaŭ. Tym nia mienš, pačynajučy ź minułaha hodu pradpryjemstva naładziła pastaŭki pradukcyi ŭ Małdovu i Ŭkrainu.
Ahułam ža mižnarodnaja hrupa kampanijaŭ Henkel, štab-kvatera ŭ Duseldorfie (Niamieččyna), maje pradstaŭnictvy bolš čym u 125 krainach śvietu.
