Pieršaja ŭ śviecie licenzija na kłanavańnie čałavieka vydadziena kampanii Sydney IVF, jakaja maje śpiecyjalizacyju ŭ halinie ekstrakarparalnaha apładatvareńnia (EKA).
U licenzijnym dazvole za metu kłanavańnia ŭkazanaje atrymańnie embryjanalnych stvołavych kletak. Dziela hetaha kampanija Sydney IVF atrymaje dostup da 7200 jajkakletak. Heta budzie pieršaj sprobaj atrymańnia stvołavych tkaninaŭ u taki sposab. Raniej navukoŭcy dziela takich metaŭ karystali inšyja kletki, u pryvatnaści, skuranyja.
Supracoŭniki Sydney IVF majuć vykarystoŭvać mietad samatyčnaha pieranosu jadra kletki (SCNT), jaki vykarystoŭvaŭsia ŭ 1996 h. ciaham kłanavańnia aviečki Doli. Sens mietadu - zamiena jadraviny kletki donara jadrom, jakoje ŭtrymlivaje infarmacyju DNK recypijenta.
Nacyjanalnaja Rada pa achovie zdaroŭja Aŭstralii maje namier ažyćciaŭlać "ščylny kantrol" za dziejnaściu pa kłanavańni embryjonaŭ. Staršynia Rady Džon Fendli padkreśliŭ, što navukoŭcy atrymali prava vyklučna na rabotu z embryjonami. I što im kateharyčna zabaroniena pierachodzić na inšuju stadyju, a mienavita ŭvodzić atrymanyja embryjony ŭ matku.
Ahulnaja zabarona na kłanavańnie była źniata ŭ Aŭstralii amal 2 hady tamu - u śniežni 2006 h. Dziela hetaha spatrebiłasia pravodzić admysłovaje hałasavańnie ŭ parłamiencie. Adnak, adpaviedna dziejučamu zakanadaŭstvu, vykarystańnie embryjonaŭ, a taksama stvareńnie ŭ chodzie daśledavańniaŭ inšych embryjonaŭ mocna abmiežavana. Kłanavańnie čałavieka ŭ repraduktyŭnych metach pakul naahuł zabaroniena.
Ekstrakarparalnaje apładatvareńnie (EKA) - adzin ź mietadaŭ lekavańnia biaspłodździa. Zaklučajecca ŭ pošuku j vyniaćci z arhanizmaŭ maci j baćki zdarovych i sumiaščalnych jajkakletki j śpiermatazoida. Paśla ŭ admysłovych pryładach u admysłovym boksie atrymlivajecca sam praces apładatvareńnia. Pieršy tydzień zarodyš raźvivajecca ŭ admysłovoj pažyŭnaj roščynie ŭ inkubatary i tolki paśla pierasadžvajecca ŭ cieła maci albo surahatnaj maci. U Biełarusi na siońnia dziejničajuć dva centry, jakija pravodziać EKA. Abodva niedziaržaŭnyja. Sproby Ministerstva achovy zdaroŭja zasnavać svoj centr pakul cierpiać niaŭdaču. Heta źviazana z adsutnaściu adpaviednych kadraŭ (lekary niedziaržaŭnych centraŭ, naturalna, nie harać žadańniem iści pracavać na staŭku zvyčajnaha lekara balnicy)
Stvołavyja kletki majuć unikalnuju zdolnaść całkam transfarmavacca ŭ kletki lubych inšych typaŭ i faktyčna źjaŭlajucca zychodnymi kletkami pry farmavańni luboj čałaviečaj tkaniny ci orhana. Navukoŭcy śćviardžajuć, što vykarystańnie stvołavych kletak moža być vielmi karysnym u pracesie transpłantacyi čałaviečych orhanaŭ i naahuł zamienie ich.
Kažuć pra pierśpiektyvu hadavańnia j pieraščepu novych zdarovych orhanaŭ sa stvołavych kletak samoha pacyjenta (u takim razie źnikaje patreba ŭ donarach i źnikaje prablema adčužeńnia orhanaŭ) albo uvod stvołavych kletak u chvory orhan i faktyčnaje vyroščvańnie zdarovaj častki "ŭ samim pacyjencie". U bližejšaj perspektyvie kažuć pra mažlivaść vykarystańnia stvołavych kletak dla lačeńnia dyjabietu, chvaroby Alchiejmiera, paralušaŭ, traŭmaŭ chrybietnaj tkaniny i špiku.
