Subota była bahataja na muzyčnyja padziei. U Atenach - finał "Eŭrabačańnia", u Łahojsku - festyval "Bitłz nazaŭždy", a ŭ Babrujsku - "Rok - za babroŭ". Teksty ŭsich piesień papiarednie ŭzhadnialisia ŭ harvykankamie. Piša Siarhiej Budkin.
Babrujsk. Spalny rajon. Scena, zbudavanaja na prystupkach miascovaha pałacu kultury. Kolkitysiačny natoŭp čakaje. Arhanizatary nervova pazirajuć na zachmaranaje nieba: za paru hadzinaŭ da pačatku vichor źnios sa sceny dach. Kali pojdzie doždž, muzykam daviadziecca adrazu zhortvacca.
Hetym razam fest byŭ pryśviečany nia stolki harotnym babram, kolki zmahańniu z dyjaksinam. Sa sceny tłumačyłasia, jak važna nie palić plastykavyja butelki, a vykidać ich u admysłovuju śmietnicu. Ekalahičny rok-fest - super-ideja. Kab jašče słova "rok" nie vyklikała ŭ raznastajnych dazvalalnych instancyjach t strachu. Babrujskaja akcyja šče raz pakazała, što najhałaŭniejšym z usich festaŭ dla biełaruskaha roku pa-raniejšamu źjaŭlajecca "Basovišča".
"Pavažaju ŭsich, chto siońnia tut vystupaje, ale jaki moža być biełaruski rok-festyval biaz topavych ajčynnych rokieraŭ?!" - kaža pierad vychadam na scenu viadučy festu Siarhiej Kuzin - kolišni supracoŭnik mienskaha FM, jaki źjechaŭ u pošukach lepšaj doli va Ŭkrainu. Fest zapomnicca biełaruskim udzielnikam šeraham poźniesavieckich biurakratyčnych praceduraŭ, praź jakija daviałosia prajści. Usie persanalii ŭzhadnialisia ź Ministerstvam kultury, a teksty ich piesień - ź miascovaj administracyjaj. U vyniku ź biełaruskamoŭnych kamandaŭ litavańnie tekstaŭ prajšła tolki "Indiga". A pra toje, što viadoŭcam minułaha festu byŭ Lavon Volski, paličyli za lepšaje naahuł nia zhadvać.
Na scenu vychodzić pieršy hurt - "KłJondajk", ź viadoŭcaj Pieršaha muzyčnaha kanału i apošniaj Rok- karanacyi Kaciaj Pytlevaj u jakaści vakalistki. U ščylnym natoŭpie aktyvizujecca milicyja. Ludzi ŭ pahonach pračesvali hurmu rok-fanataŭ ciaham usiaho festu na pradmiet "apazycyjnych" ściahoŭ dy raściažak. Biezvynikova. Zielanieli chiba ściažki fundatara festu - brovaru "Siabar". A padčas vystupu "Indiga" miascovyja patryjoty razharnuli... raściažku BRSM.
Ale tyja niekalki dziasiatkaŭ dziaŭčat, jakija stali ŭ pieršy šerah ź vializnaj raściažkaj "Bi-2", nie cikavilisia ani bluzavymi impravizacyjami Jurja Michajłava z "Madery chard bluz", ani žyviolnymi rykami vakalistaŭ "TT-34". Babrujsk čakaŭ hedłajneraŭ festu - hurtu "Bi-2" i paprostu tryvaŭ usich, chto vystupaŭ pierad imi. Vystup "Bi-2" dla Babrujsku toje samaje, što vystup Poła Makartni dla Liverpulu. Kab Lova i Šura mieli bolš času padstroić hitary, nia vystupiŭ udzielnik turu "Za Biełaruś" hurt "Nea". Pierad vychadam "Bi-2" achova adciaśniła navat haściej festu ad sceny.
"Bi-2" pryjechali na radzimu "pryfaneranyja" - zamiest žyvoha klavišnika hraŭ kamputar. Ale ziemlaki nie kryŭdavali. Rasiejski hurt, jaki zhadvaje pra babrujskija karani chiba što na hastrolach u Biełarusi, kupaŭsia ŭ słavie. Na pytańnie vakalista Šury, ci jość tut vychavancy 13-j siaredniaj škoły, i maładyja, i staryja zaraŭli: "Jość!" Aproč taho, słovy piesień viedali ŭsie babrujčanie. Akramia, napeŭna, rabotnikaŭ idealahičnaha adździełu harvykankamu.
❏
Hladzi jašče:
Palina Smołava zaniała ŭ paŭfinale "Eŭrabačańnia" pieradapošniaje miesca
Źmicier Padbiareski: U Smołavaj nie było ni kaliva aryhinalnaści
