Ctaršynia Centralnaj kamisii pa vybarach i praviadzieńni respublikanskich refierendumaŭ Lidzija Jarmošyna ličyć «niespraviadlivym i niapravilnym» rašeńnie Jeŭrasajuza pakinuć jaje ŭ śpisie nieŭjaznych.Pra heta jana zajaviła 13 kastryčnika žurnalistam.
Jak užo paviedamlaŭ BiełaPAN, ministry zamiežnych spraŭ krain Jeŭrasajuza na pasiadžeńni 13 kastryčnika ŭ Luksiemburhu prypynili na paŭhoda dziejańnie zabarony na ŭjezd u krainy ES prezidenta Biełarusi Alaksandra Łukašenki i 35 biełaruskich čynoŭnikaŭ. Pavodle źviestak ahienctva Frans‑Pres, u śpisie nieŭjaznych zastalisia piać čałaviek: Lidzija Jarmošyna i čatyry padazronyja ŭ dačynieńni da palityčnych źniknieńniaŭ u 1999—2000 hadach — ciapierašni ministr unutranych spraŭ Uładzimir Navumaŭ, były dziaržsakratar Savieta biaśpieki Viktar Šejman, były kiraŭnik MUS Juryj Sivakoŭ i były kamandzir bryhady śpiecnaza ŭnutranych vojskaŭ MUS Dźmitryj Paŭličenka.
«Paŭhoda — heta nadta mały termin, kab možna było havaryć ab realnym paciapleńni. Heta ŭ peŭnym płanie krychu źnievažalnaje pasłableńnie», — zajaviła Ł.Jarmošyna.
Kiraŭnik CVK paviedamiła, što budzie praciahvać pracavać hetak ža, jak pracavała dahetul. «Ja dumaju, niaŭdziačnaść — heta adzin ź biblejskich zahanaŭ»,— zaŭvažyła Ł.Jarmošyna. Pavodle jaje słoŭ, rašeńnie ES — «demanstracyja toj samaj niaŭdziačnaści».
Jak zaznačyła kiraŭnik CVK, na siońniašnim pasiadžeńni kamisii prysutničali niekalki naziralnikaŭ, choć da hetaha času jany ŭžo stracili adpaviedny status. «Ci ž heta nie pakazčyk dobraj voli biełarusaŭ», — zajaviła jana.
