Pra heta zajavili Radźkoŭ i Pralaskoŭski na I źjeździe hetaj łukašenkaŭskaj arhanizacyi.
«Biełaja Ruś» atrymała pieršy vopyt udziełu ŭ palityčnaj kampanii. Pra heta, vystupajučy 25 kastryčnika na pieršym źjeździe hramadskaha abjadnańnia, zajaviŭ jaho staršynia, ministr adukacyi Biełarusi Alaksandr Radźkoŭ.
Pavodle jaho słoŭ, u parłamienckaj vybarčaj kampanii brali ŭdzieł zvyš 10 tys. členaŭ arhanizacyi. Heta — davieranyja asoby kandydataŭ u deputaty, členy ŭčastkovych vybarčych kamisij, kala 3 tys. naziralnikaŭ.
"Bolš jak treć ź liku členaŭ savieta respubliki i amal kožny druhi deputat pałaty pradstaŭnikoŭ źjaŭlajucca členami «Biełaja Rusi», — paviedamiŭ A.Radźkoŭ.
Staršynia abjadnańnia painfarmavaŭ, što zaviaršajecca etap stanaŭleńnia abjadnańnia. Pavodle jaho słoŭ, «Biełaja Ruś» — adna z samych masavych arhanizacyj, jakaja «vykazvaje intaresy ŭsich sacyjalnych słajoŭ nasielnictva Biełarusi».
«Palityčnuju partyju maje sens stvarać, kab zmahacca za ŭładu.
Kali budzie źmieniena vybarčaje zakanadaŭstva, pry jakim palityčnym partyjam budzie dazvolena abiracca, to tady i budzie stavicca pytańnie ab stvareńni palityčnaj partyi»,— zajaviŭ žurnalistam 25 kastryčnika paśla zakančeńnia pieršaha źjezda RHA «Biełaja Ruś» člen respublikanskaha savieta hetaj arhanizacyi Aleh Pralaskoŭski.
A.Pralaskoŭski źjaŭlajecca dyrektaram Infarmacyjna-analityčnaha centra pry Administracyi prezidenta. Raniej zajmaŭ pasadu pamočnika prezidenta — načalnika hałoŭnaha ideałahičnaha ŭpraŭleńnia Administracyi prezidenta Biełarusi.
Pavodle słoŭ čynoŭnika, zaraz «Biełaja Ruś» stavić zadaču akazvać padtrymku ŭładzie na ŭsich uzroŭniach.
«Dumaju, z časam, kali arhanizujemsia i adčujem nieabchodnaść, «Biełaja Ruś» budzie pretendavać na status palityčnaj partyi», — zajaviŭ žurnalistam staršynia arhanizacyi ministr adukacyi Alaksandr Radźkoŭ. Pavodle jaho słoŭ, pakul u «Biełaja Rusi» «jość mahčymaści realizavać svaje idei na ŭzroŭni hramadskaha abjadnańnia».
