U adździele ŭnutranych spraŭ Navabielickaha rajona Homiela vyrašajecca pytańnie ab zaviadzieńni kryminalnaj spravy ŭ dačynieńni da 19‑hadovaha miascovaha žychara, jaki ździejśniŭ napad na bryhadu chutkaj mieddapamohi. Vynik budzie paśla atrymańnia źviestak ekśpiertyzy ab košcie miedycynskich pryboraŭ i sumie naniesienaha ŭronu.
Jak paviedamili BiełaPAN u adździele kryminalnaha vyšuku AUS Navabielickaha rajona, viečaram 23 kastryčnika ŭ dziažurnuju častć «chutkaj» pastupiła telefanavańnie ad maładoha čałavieka ab tym, što jaho maci drenna siabie adčuvaje.
Kali mašyna prybyła da padjezda doma, chłopiec, jaki znachodziŭsia ŭ stanie ałkaholnaha apjanieńnia, staŭ kidacca na ŭračoŭ, vykidać ich z aŭtamabila i brydka łajacca.
Niahledziačy na heta, urač i fielčar prajšli ŭ padjezd i ŭbačyli žančynu, jakaja lažała na leśvičnaj placoŭcy. Miedyki sprabavali dapamahčy chvoraj, ale jaje 19‑hadovy syn pieraškadžaŭ ich pracy, niecenzurna łajaŭsia, udaryŭ nahoj pa tvary ŭrača, a zatym vychapiŭ u miedykaŭ čamadan z pryborami — defibrylataram i kardyjohrafam i skinuŭ na nižejšy pavierch. Prybory raźbilisia, uračy vyklikali milicyju. Chulihan byŭ zatrymany, ale zatym adpuščany da vyrašeńnia pytańnia ab raspačynańni kryminalnaj spravy.
Pry apytańni supracoŭniki milicyi vyśvietlili, što ŭ toj viečar małady čałaviek, užyŭšy ałkahol, pasvaryŭsia z maci, jany vybiehli na leśvičnuju placoŭku, dzie žančynie stała drenna.
«U majoj praktycy, a pracuju ja ŭ milicyi 15 hadoŭ, heta pieršy vypadak napadu na ŭračoŭ «chutkaj», — zaznačyŭ načalnik adździeła kryminalnaha vyšuku Jaŭhien Marachin. — Paśla atrymańnia nieabchodnych źviestak ekśpiertyzy ŭ chutkim časie budzie raspačata sprava ŭ dačynieńni da chulihana. Spadziajusia, jon atrymaje zasłužanaje pakarańnie».
Uračy «chutkaj», jakija paciarpieli na vyjeździe, pakul admaŭlajucca davać jakija‑niebudź kamientaryi, ale zaznačajuć, što ź imi ŭpieršyniu adbyŭsia taki incydent.