U Bieraści ŭ mielijaracyjnym kanale ŭtapiłasia dziaŭčynka 2004 hoda naradžeńnia..
Jak paviedamili BiełaPAN u Maskoŭskim rajonnym adździele ŭnutranych spraŭ, trahiedyja adbyłasia 2 listapada prykładna ŭ 16.20 niedaloka ad vulicy Urubleŭskaha ŭ siektary pryvatnych žyłych damoŭ.
Pavodle papiaredniaj infarmacyi, dziaŭčynka ź inšymi dziećmi hulała na bierazie kanała i ŭpała ŭ vadu. Jaje vyciahnuli dvoje darosłych, jakija znachodzilisia niepadalok, adnak miedykam nie ŭdałosia vyratavać žyćcio dziciaci.
Pravierku pa dadzienym fakcie pravodzić prakuratura Maskoŭskaha rajona Bresta.
Pavodle infarmacyi abłasnoha savieta Arhanizacyi pa vyratavańni na vodach, za dzieviać miesiacaŭ hetaha hoda ŭ vobłaści ŭtapilisia 113 čałaviek (ź ich 11 dziaciej), za taki ž pieryjad 2007 hoda — 154 čałavieki (u tym liku vosiem dziaciej).
