"Jak tabie, siabra Dźmitry, papraŭki da Kanstytucyi?" Padčas vizytu prezydenta Rasiei ŭ Karakas.
Prezydent Venesueły Uha Čaves zajaviŭ, što budzie znoŭ dabivacca źmienaŭ u kanstytucyju, jakija dazvolili b jamu znoŭ balatavacca na pasadu lidera krainy.
Čaves zajaviŭ svaim prychilnikam na mitynhu ŭ Karakasie, što pytańnie pra admienu kolkaści terminaŭ, jakija adzin i toj ža čałaviek moža znachodzicca na prezydenckaj pasadzie, pavinna być znoŭ vyniesiena na referendum.
Siońniašni prezydent Venesueły upieršyniu zaniaŭ pasadu ŭ 1998 h. Pavodle zakonu, jon pavinien pakinuć prezydencki fatel u 2012 h., kali skončycca jaho čarhovy termin.
U minułym śniežni ŭ krainie prajšoŭ referendum, na jakim vybarcy adkinuli prapanovu najlepšaha siabry biełaruskaha lidera (darečy, Čaves tolki na miesiac i dyva starejšy za Łukašenku) admianić hetyja abmiežavańni. Pry hetym praciŭniki źmienaŭ u kanstytucyju atrymali pieramohu ź niaznačnaj pieravahaj.
«Letaś, kali my prajhrali referendum, ja skazaŭ, što pavinien padparadkavacca rašeńniu bolšaści. Ale zaraz, kali jasna baču vialikuju pahrozu, jakaja sychodzić ad hetych fašystaŭ … ja kažu, vy mieli racyju, Čaves nia syjdzie», ‑‑ skazaŭ prezydent Venesueły.
«Ja hatovy, i kali zdaroŭje dazvolić, z boskaj dapamohaj ja budu z vami da 2019 ci 2021 hodu», — praciahnuŭ Čaves.
Pradstaŭniki apazycyi śćviardžajuć, što adno i toje pytańnie nia moža vynosicca na referendum dvojčy.
Ekanamičnyja prablemy
Jak pieradaje karespandent Bi‑Bi‑Si ŭ Karakasie, Čaves, mahčyma, znojdzie sposab abyści heta abmiežavańnie. Reč u tym, što na śniežanski referendum vynosiŭsia ceły pakiet kanstytucyjnych źmienaŭ, adna ź jakich prapanoŭvała admienu abmiežavańniaŭ na kolkaść prezydenckich terminaŭ.
U vypadku kali plebiscyt adbudziecca,
na jaho moža farmalna być vyniesiena tolki adno pytańnie.
Niajasna, ci zmoža Čaves pieramahčy. Miarkujučy pa sacapytańniach, prezydenta padtrymlivajuć usio jašče bolej za 50% nasielnictva, ale apošnim časam apazycyja značna umacavała svaje pazycyi.
Na miascovych vybarach, što prajšli niadaŭna, partyja Čavesa zhubiła ŭpłyŭ u mnohich rehijonach krainy, u tym liku i Karakasie.
Ahladalniki taksama adznačajuć, što ŭradu stała usio ciažej zmahacca ź inflacyjaj, hadavyja pakazčyki jakoj siahajuć da 36%, jamu taksama nia ŭ siłach dać rady złačynnaści i spynić razvał infrastruktury.
