Akramia taho, z 8 pa 15 śniežnia ŭ Biełarusi pa zaprašeńni Nacyjanalnaha banka budzie pracavać misija techničnaha sadziejańnia pa pytańniach hrašova‑kredytnaj palityki.
Jak paviedamlaŭ BiełaPAN, z prośbaj vydzielić reziervovy kredyt u pamiery 2 młrd. dołaraŭ Biełaruś źviarnułasia da MVF u siaredzinie kastryčnika.
Ekśpierty fondu pracavali ŭ Minsku z 27 kastryčnika pa 22 listapada.«Biełaruś źviarnułasia pa atrymańnie hetaha kredytu ŭ metach pavieličeńnia dziaržaŭnych zołatavalutnych reziervaŭ i stvareńnia «paduški biaśpieki», nieabchodnaj dla stabilnaj raboty ekanomiki va ŭmovach suśvietnaha finansavaha kryzisu», — patłumačyli ŭ Nacbanku.
Paśla taho jak usie techničnyja pytańni, jakija tyčacca mahčymaha vydzialeńnia kredytu, buduć uzhodnienyja bakami, adpaviedny pakiet dakumientaŭ pavinien być pradstaŭleny vykanaŭčamu savietu MVF dla kančatkovaha zaćviardžeńnia.
Pieršy namieśnik staršyni praŭleńnia Nacyjanalnaha banka Pavieł Kałaur, adkazvajučy na pytańni žurnalistaŭ 27 listapada, zaznačyŭ, što pazityŭna aceńvaje chod pieramoŭ i spadziajecca na ich zaviaršeńnie ŭ śniežni.
Pry hetym jon nie paćvierdziŭ i nie abvierh infarmacyju ab tym, što ŭ jakaści adnoj z umoŭ vydzialeńnia Biełarusi kredytu MVF prapanavaŭ 20‑pracentnuju devalvacyju biełaruskaha rubla.
«Biełaruski rubiel u adpaviednaści z Asnoŭnymi kirunkami kredytna‑hrašovaj palityki pryviazany da dołara, u jakoha byli davoli rezkija vahańni adnosna inšych valut, — zaznačyŭ P.Kałaur. — Va ŭmovach vahańniaŭ suśvietnych valut abmienny kurs biełaruskaha rubla taksama vahajecca ŭ peŭnym kalidory. Ale našy vahańni znachodziacca i buduć znachodzicca ŭ strohaj adpaviednaści z Asnoŭnymi kirunkami hrašova‑kredytnaj palityki».
Pavodle słoŭ P.Kałaura, MVF nie razhladaje niejkija žorstkija ŭmovy, a źviartaje ŭvahu na nieabchodnaść adekvatnaj karekciroŭki kursu z ulikam źmieny abmiennych kursaŭ inšych valut.
