26 śniežnia, u druhi dzień cudoŭnaha Śviata Naradžeńnia Chrystovaha pavodle novaha stylu, u 14‑00 u teatralnaj zali Čyrvonaha Kaścioła Śv. Symona i Aleny adbudziecca kancert «Biełaruski Chryścijanski Chit».
U kancercie na Rastvo voźmuć udzieł hurt «Psalmiary», vykanaŭcy Andrej Mielnikaŭ, Inesa Leadanskaja, Jadviha i Hanna Bahdanovičy, Aleś Narkievič, a taksama čakajecca ŭdzieł choru «Hloryja». Uvachod volny.
Akurat da kancerta, u 3‑j dekadzie śniežnia vychodzić čarhovy dysk ź sieryi Biełaruski chryścijanski chit pad nazvaj «Chrystos Naradziŭsia» – treciaja zborka najlepšych biełaruskamoŭnych chryścijanskich śpievaŭ, hetym razam pryśviečanych śviatu Chrystovaha Naradžeńnia. Śpievy, jakija ŭvajšli va ŭsie 3 składanki, adabranyja pavodle strohich kryteraŭ, prajšli ratacyju ŭ chryścijanskich fokus‑hrupach (adpaviedna pravasłaŭnaj, katalickaj, hreka‑katalickaj, baptysckaj, piacidziesiatnickaj, poŭnaevanhielskaj — i h.d.), i vierniki sami vyznačyli najlepšyja siarod ich. Najbolš chitovymi vykanaŭcami słuchačy pryznali hurty «Tezaŭrus», «Psalmiary», «DVA», «Niebaschił», «Kadaš». Siarod vykanaŭcaŭ – Alesia Ŭnukoŭskaja, bardy Andrej Mielnikaŭ, Valžyna Ciareščanka i Inesa Leadanskaja dy inšyja. Pačynajucca ŭsie dyski «Biełaruskaha Chryścijanskaha Chita» himnam «Mahutny Boža», skančajucca – śpieŭnaj malitvaj «Ojča naš».
Na kancercie možna budzie nabyć usie try pieršyja kružełki: «Biełaruski Chryścijanski Chit», «Biełaruski Chryścijanski Chit‑2» i «Chrystos naradziŭsia» (Chryścijanski Kaladny Chit). Infarmacyju pra kancert možna atrymać pa telefonach: 8‑029‑307‑27‑13 (Valeryja), 8‑029‑593‑50‑66 (Iryna).
Rychtujucca da vydańnia taksama inšyja dyski hetaj sieryi «Chrystos uvaskros!» (Biełaruski Vielikodny Chit), «Biełaruski Chryścijanski Rok», «Bardaŭski Chryścijanski Chit» i «Biełaruski Liturhičny Śpieŭ». Nakont usich prapanovaŭ na hetyja składanki, a taksama pa zamovy dyskaŭ možna źviartacca pa telefonach: 8‑029‑861‑62‑28, 8‑029‑656‑00‑64 (Valancina).
