albo Paskareńnie na tle zapavolvańnia. Piša ekanamist Alaksandr Čubryk.
Na minułym tydni Nacyjanalny statkamitet — Biełstat — abvieściŭ vyniki pracy ekanomiki za 11 miesiacaŭ. Nie viedaju, jak chto, ale ja ździviŭsia — u paraŭnańni z studzieniem-kastryčnikam rost VUP paskoryŭsia i skłaŭ 10,8% (u paraŭnańni z 11 miesiacami minułaha hodu)! Dy ŭ toj čas, kali ŭradoŭcy havorać pra kryzis, rost zapasaŭ dy zapavolvańnie rostu. Naturalna, palez na sajt (dla cikaŭnych — belstat.gov.by) dy pačaŭ raźbiracca.
Jak vyjaviłasia, u studzieni—listapadzie pramysłovaja vytvorčaść vyrasła na 12,7% (u paraŭnańni z adpaviednym pieryjadam minułaha hodu). Vyhladaje niakiepska. Ale ž za listapad temp pryrostu skłaŭ usiaho 4,1% (da listapada 2007‑ha). Heta ŭžo bližej da suśvietnych tendencyjaŭ, asabliva kali ŭličyć, što ŭ kastryčniku było 10,3%, a ŭ vieraśni — 13%.
Ale i heta jašče nie ŭsio. Bo, jak słušna kazali roznyja aficyjnyja asoby, apošnija dva miesiacy raśli zapasy pramysłovaj pradukcyi.
Kali adniać ad abjomaŭ pramysłovaj vytvorčaści za kastryčnik i listapad košt «nazapašanaj» hatovaj pradukcyi, to vyjdzie, što ŭ kastryčniku pramysłovaja vytvorčaść vyrasła na 5,9%, a ŭ łastapadzie — skaraciłasia na 3,2% u paraŭnańni z adpaviednymi pieryjadami minułaha hodu.
Źviartaje ŭvahu taki fienomien:
rost u asnoŭnych halinach pramysłovaści (ich dzieviać — elektraenierhietyka, paliŭnaja pramysłovaść, čornaja mietałurhija, chimija i naftachimija, mašynabudavańnie, drevaapracoŭka, budmateryjały, lohkaja i charčovaja pramysłovaść, i ŭ ich vyrablajecca 85—90% usioj pramysłovaj pradukcyi) čas ad času šmat pavolniejšy, čym rost u pramysłovaści ŭvohule.Heta takija nievialikija haliny, jak kalarovaja mietałurhija, šklanaja i parcalanava‑fajansavaja, mukamolnaja, mikrabijałahičnaja, miedyčnaja i palihrafičnaja pramysłovaść.«Inšyja haliny» źjaŭlajucca svojeasablivaju «čornaju skryniaj», jakaja žyvie ŭłasnym žyćciom.
Kali ŭ asnoŭnych halinach usio dobra, to «inšyja» rastuć pavolna, kali kiepska — rost u ich raptam paskarajecca. Ci prosta vytvorčaść u ich raście ŭ niekalki razoŭ chutčej. Nie zrabiŭsia vyklučeńniem i listapad hetaha hodu — vytvorčaść u dzieviaci asnoŭnych halinach (biez uliku składoŭ) vyrasła ŭsiaho na 2,2%, a ŭ inšych halinach — na 16,1% (u paraŭnańni ź letašnim listapadam). Kali skarektavać tempy rostu ŭ hetych halinach, to vyjdzie, što pramysłovaść (a značyć, i ekanomika ŭvohule) raście šmat pavolniej, čym heta padajecca aficyjnaj statystykaj.
Što da paskareńnia rostu VUP, to aficyjnaja statystyka tłumačyć jaho najpierš bumam u sielskaj haspadarcy. U kastryčniku — rost na 18,3%, a ŭ listapadzie — na 23,1% proci adpaviednych miesiacaŭ 2007‑ha. Voś jakaja halina ekanomiku vyciahnuła! Tolki ŭ minułyja hady časta byvała, što rost u sielskaj haspadarcy ŭ 4‑m kvartale źmianiaŭsia zapavolvańniem u 1‑m kvartale nastupnaha hodu.
Pamiatajecie, niadaŭna zarobki biudžetnikam nibyta padvysili, a potym pierahledzieli? To i z statystykaj hetaksama. Nacyjanalnyja admietnaści…
