zasnavalniki partału Siarhiej Budkin i Viecier Miechaničny
«Tuzinu Hitoŭ» — 5 hod.
Vy zachodzicie na adras music.fromby.net i pampujecie sabie na kamputar apošnija pieśni ajčynnych vykanaŭcaŭ. Akramia hetaha na sieciŭnaj staroncy možna pračytać apošnija muzyčnyja naviny i dasłać u chit‑parad svoj hołas za ŭlubionuju pieśniu.
«Tuzin Hitoŭ» ździejśniŭ u ajčynnaj internet‑prastory jak nie revalucyju, dyk pieravarot.Paśla źjaŭleńnia partału biełaruskaja pieśnia zrabiłasia mabilnaj: naprykład, ciapier jaje, nacisnuŭšy razoŭ kolki pa kłavijatury, možna pačuć za miežami Biełarusi.
Pa‑druhoje, partał stvaryŭ virtualnuju placoŭku, dzie sustrakajucca muzyki, ich słuchačy, a taksama muzyčnyja pradusary. U krainie, dzie šoŭ‑biznes hibieje, a prasoŭvańnie rok‑muzyki dyk uvohule trymajecca na plačach samich vykanaŭcaŭ, paŭstaŭ sajt, jaki stvaraje patrebny dla kožnaha tvorcy rozhałas.
Adzin z stvaralnikaŭ partału, žurnalist Siarhiej Budkin sa ździejśnienaha najbolš hanarycca ličbami: «Ujavicie, za piać hadoŭ u Siecivie nas naviedała bolš za miljon čałaviek! 50 tysiač spampoŭvańniaŭ biełaruskich pieśniaŭ štomiesiac». A kali da hetych ličbaŭ dadać 150 vialikich recenzijaŭ na muzyčnyja navinki, dyk atrymajecca źmiastoŭny žyćciapis sučasnaj ajčynnaj alternatyŭnaj muzyki.
Prajekt «Tuzin Hitoŭ» — niekamiercyjny.
Haspadar sajtu, moža być, sama zahadkavaja postać biełaruskaj muzyčnaj tusoŭki, Viecier Miechaničny (čałaviek, jaki navat svaim kaleham pa sajcie nie raskryvaje sapraŭdnaha imia)ličyć, što meta «Tuzina Hitoŭ» — nie pierachod na ekanamičnyja rejki, a pašyreńnie mahčymaściaŭ sajtu.
Jon kaža: «Nam daspadoby pracavać u našym farmacie. Z adnaho boku heta nieprybytkova, ale, ź inšaha boku, takaja niekamiercyjnaść šmat u čym raźviazvaje ruki, robić valniejšymi, i dazvalaje nam danosić da naviedvalnikaŭ svaje idei, biespasiarednie stvarać muzyčny kantekst. U budučym ža my płanujem zrabić sajt jašče bolš interaktyŭnym, dać našym naviedvalnikam mahčymaść pisać svaje naviny, a taksama ŭstalujem siekcyju videa».
Kali napačatku šlachu partał «Tuzin hitoŭ» tolki adlustroŭvaŭ padziei ŭ biełaruskaj muzycy i muzyčnym asiarodku, dyk ciapier sam čaściakom źjaŭlajecca ńjusmejkieram. Voś naprykład hetymi dniami, sajt nie prosta śviatkuje piacihodździe, ale
i vydaŭ da nahody piesiennuju spravazdaču, multymiedyjny dysk «Premjer Tuzin‑2008», kudy ŭvajšli najlepšych 12 pieśniaŭ,vyznačanych hałasavańniem słuchačoŭ sajtu. Tut buduć i viadomyja hurty: J:Mopc, Neura Dubel, IQ48, a taksama novyja imiony: śpiavačka Taciana Biełanohaja, hrupy Jab Club I ILO&friends.
Darečy, pavodle stvaralnikaŭ sajtu, samaj «pačutaj» pieśniaj za ŭsiu historyju partału była pieśnia hurtu N.R.M. — «Hadziučnik». Jaje pasłuchali (ci prynamsi spampavali) blizu 100 tysiačaŭ čałaviek, to bok kožny soty biełarus.