U vajenkamat Salihorska dastavili moładzievaha aktyvista Ivana Šyłu.
Milicyjanty ceły dzień dziažuryli pad voknami jahonaj kvatery. Dzieści a 17:00 jany pakazali sankcyju, vypisanuju namieśnikam prakurora Salihorskaha rajona sp.Bielčynam, na praviadzieńnie pieratrusu ŭ kvatery.
Ivana adrazu zatrymali i dastavili ŭ vajenkamat, dzie chłopiec i znachodzicca ciapier.
18:27. Jak paviedamiŭ nam baćka Ivana Ŭładzimir Šyła, chłopca ŭ supravadžeńni dvuch ludziej u cyvilnym, a taksama vajenkomaŭskaha majora, advieźli ŭ Salihorskuju balnicu, chacia pracoŭny čas tam užo skončyŭsia.
Vajenkamatu treba analizy Ivana Šyły. Chłopiec admoviŭsia ich zdavać. Paśla nievialikaj telefonnaj kansultacyi maładziona znoŭ pavieźli ŭ vajenkamat.
19:04 Brat Ivana Illa Šyła paviedamiŭ, što ŭ vajenkamat terminova pačali padciahvacca lekary. Napeŭna, buduć źbirać kamisiju, kab vyznačyć, ci hodny chłopiec da słužby.
20:46. U vajenkamat zaprasili baćku i brata Ivana Ŭładzimira i Illu Šyłaŭ adpaviedna.
21:07. Vajenkomaŭskaja kamisija pryznała Ivana Šyłu hodnym dla prachodžańnia terminovaj vajskovaj słužby. Viečaram chłopca adviazuć u Minsk na pryzyŭny punkt, adkul raźmiarkujuć u adnu z vajskovych čaściej.
Ivan navat nie projšoŭ miedyčnaj kamisii. Chłopiec patrabuje razhladu hetaj spravy ŭ sudzie, a na čas pracesu spynić pryzyŭ.
Kaža, što najchutčej słužyć adpraviać u vojski supraćpavietranaj abarony.
10:34. Ivana Šyłu trymajuć u Zavadskim vajenkamacie Minsku, dzie i pravioŭ noč. Chłopiec admoviŭsia prachodzić miedkamisiju, a taksama napisaŭ niekalki skarhaŭ.
Ciapier vajskoŭcy rajacca, adpraŭlać skarhi, ci adpraŭlać chłopca ŭ častku. Abiacajuć, što pojdzie Ivan słužyć niekudy pad Lepiel.
***
Niekalki milicyjantaŭ taksama byli ŭvarvalisia ŭ kvateru Źmitra Chviedaruka. Jany patłumačyli, što nibyta jość pradpisańnie ŭ prymusovym paradku dastavić jaho ŭ pryzyŭnuju kamisiju ŭ vajenkamat. Chłopca adbiŭ baćka.
18:38 Adbiŭ, ale nienadoŭha. Ciapier chłopiec znachodzicca ŭ vajenkamacie Pieršamajskaha rajonu Minsku.
19:22. Źmitru vypisali paviestku ŭ vajenkamat na zaŭtra a 9:00. Ciapier advieźli ŭ Pieršamajski RUUS. Kažuć, što datyčyć incydenta, jaki zdaryŭsia doma ŭ chłopca, kali jon nie ŭpuskaŭ u kvateru milicyjantaŭ.
20:52. Chviedaruku paviedamili, što jon budzie adbyvać pakarańnie za akcyju na 1 traŭnia.
Nahadajem, što Źmicier zavočna byŭ asudžany na 10 sutak aryštu, ale pakarańnie ŭsio jašče nie adbyŭ. Chłopiec pa-raniejšamu ŭ pastarunku.
Padrabiaznaści paźniej na sajcie.
Ivan Šyła. Fota Julii Daraškievič