Ad 12 červienia padaražaŭ prajezd na čyhunačnym transparcie va Ŭkrainie. Dla Krymu heta nia lepšy padarunak da pačatku kurortnaha sezonu. Bo 90% turystaŭ pryjaždžajuć da mora mienavita na ciahnikach.
Na krymskich vakzałach pačalisia haračyja dni. Štodnia na paŭvostraŭ pryjaždžajuć tysiačy kurortnikaŭ z roznych haradoŭ Ukrainy, Biełarusi i Rasiei. Zrešty, u ciahniku z Murmansku pasažyraŭ niašmat. Kusajucca novyja ceny na kvitki, pužajuć palityčnyja naviny z Krymu. "Nu, bajacca ludzi ŭ suviazi z apošnimi padziejami. Chacia razumiejuć, što zvyčajny narod tut zusim nie pry čym," - kaža turystka z Murmansku.
Padaražańnie adpačynku - abjektyŭnaja nieabchodnaść - pierakonvajuć u krymskim ministerstvie kurortaŭ. Bo padvysilisia košty na enerhanośbity, paliva i pradukty. Takim čynam, dla niebahatych turystaŭ, jakija tradycyjna vybirali Krym, pajezdka stanovicca niavyhadnaj. Zamožnyja - jeduć za tyja ž hrošy ŭ Bałharyju i Turcyju. A dla turfirmaŭ, jakija aryjentavalisia na Krym, udaram stali novyja ceny na kvitki.
"Turfirmy i turaperatary źviarstali svaje pakiety ŭžo daŭno. Jany pradavali ich razam z prajezdam, ad listapadu. Što im ciapier rabić?" - kaža Maryna Ślesarava, namieśnica ministra kurortaŭ i turyzmu Aŭtanomnaj respubliki Krym.
Rasiejskija turaperatary bajacca pradavać pucioŭki na paŭvostraŭ taksama i z-za fieadasijskich padziejaŭ. Ludzi pačali admaŭlacca ad puciovak, asabliva dziciačych.
"Tyja turaperatary, jakija hadami pracavali z zdraŭnicami, asabliva ŭschodnimi, pačynajuć sumniavacca," - paviedamlaje Uładzimier Sałaŭjoŭ, ministar kurortaŭ i turyzmu Krymu. - Apošnija padliki śviedčać - kolkaść turystaŭ u Krymie na letašnim uzroŭni. Ale ci nia źmienšycca ich kolkaść, zaležyć nia tolki ad biznesoŭcaŭ, ale i ad palitykaŭ.
