3 lutaha ŭ Homieli za arhanizacyju šeścia milicyja zatrymała troch aktyvistaŭ «Maładoha Frontu» i arhkamitetu partyi «Biełaruskaja chryścijanskaja demakratyja».
U Centralnym RUUS padčas dahladu pikietoŭcaŭ raspranuli dahała. A potym advieźli ŭ sud, dzie na ich nakłali štrafy.
Na chodniku, jaki prylahaje da Homielskaha placu Lenina, čaćviora maładych ludziej razharnuli bieł‑čyrvona‑bieły ściah i šaścimietrovuju raściažku.
Havoryć udzielnik akcyi Andruś Cianiuta:
«My razharnuli raściažku: «KDB nas z pracy honić — chto abaronić?» My chacieli pryciahnuć uvahu hramadskaści na toje, što ŭłada, jakaja pavinna achoŭvać svaich hramadzianaŭ, zvalniaje ludziej z pracy, sadzić u turmy za ich palityčnyja pierakanańni. My išli da abłvykankamu. Nas zatrymali milicyjanty. I supracoŭniki DAI sprabavali zatrymać. U dačynieńni asabista da mianie skłali dva administracyjnyja pratakoły — za supraciŭ milicyi i za niesankcyjanavanaje šeście».
Apaviadaje Vasil Tokaranka:
«Ja takoha nidzie ŭ Jeŭropie nie bačyŭ, kab čałavieka raspranali całkam — dahała! Raspranuli dahała. U prysutnaści niejkich asob u cyvilnym mianie navat prymusili, prabačcie, trusy źniać. Voś da čaho dažylisia!»
Razam z udzielnikami akcyi pratestu zatrymany byŭ i aktyvist «Biełaruskaj chryścijanskaj demakratyi» Kastuś Žukoŭski, jaki tolki zdymaŭ akcyju na videakamieru:
«Ja ŭvohule tut ni pry čym. Ułada skiravała represii ŭ inšaje rečyšča. Jana pačała vialikija štrafy ni za što davać.Ułada apuściłasia ŭžo da taho, što chapaje tych, chto zdymaje na svaju ŭłasnuju kamieru šeście, mitynh ci viasielle jakoje. Chutka, peŭna, i viasielle nie zdymieš. Ja zdymaŭ, jak było šeście ludziej u baraćbie za svaje pravy. Mianie paviazali i dali ahułam štraf 100 bazavych vieličyniaŭ — try z pałovaj miljony rubloŭ. Heta prosta žach — dva pratakoły skłali».
Składzienyja milicyjantami pratakoły ŭ apieratyŭnym paradku razhledzieła sudździa Centralnaha rajonu Homiela Maryna Damnienka.
Andrej Cianiuta za niesankcyjanavanaje šeście i supraciŭ milicyi aštrafavany na 2 miljony 800 tysiač rubloŭ, Vasil Tokaranka — na 1 miljon 750 tysiač rubloŭ.
Sudździa Damnienka nie źviarnuła navat uvahi na patrabavańnie zaprasić u sud pierakładčyka z rasiejskaj movy na biełaruskuju albo pieradać spravu sudździ, jaki vałodaje biełaruskaj movaj.
