Rada Biełaruskaj Narodnaj Respubliki pryniała zajavu z nahody padpisanych Alaksandram Łukašenkam u Maskvie pahadnieńniaŭ.
«Dniami ŭ Maskvie Alaksandar Łukašenka padpisaŭ čarhovyja pahadnieńni, jakija staviać pad pahrozu suverenitet i Niezaležnaść Biełarusi., — havorycca ŭ zajavie. ‑‑ Pryznańnie rasiejskaha rubla ŭ jakaści tak zvanaj «rehijanalnaj valuty» — heta čarhovaja kapitulacyja Łukašenki pierad Kramlom, sproba raspłacicca jašče adnoj častkaj suverenitetu krainy za piatnaccać hadoŭ svajho niekampetentnaha kiravańnia. Damoŭlenaści ab adzinaj z Rasiejaj systemie supraćpavietranaj abarony i stvareńni kalektyŭnych siłaŭ aperatyŭnaha reahavańnia sumiesna z Rasiejaj i inšymi niedemakratyčnymi režymami zamacoŭvajuć Biełaruś u arbicie militarysckich intaresaŭ Kramla».
Rada BNR źviartaje ŭvahu, što «hetyja damoŭlenaści adbylisia na fonie dalejšaj ekspansii Rasiei litaralna va ŭsie sfery žyćcia Biełarusi i źniščeńnia nacyjanalnych kaštoŭnaściaŭ.
Voś užo niekalki hadoŭ hramadzianie Rasiei vałodajuć absalutna roŭnymi pravami na nabyćcio nieruchomaści ŭ Biełarusi, pry tym, što hramadzianie inšych krainaŭ (u tym liku i etničnyja biełarusy zamiežža) takich mahčymaściaŭ pazbaŭlenyja. Adnačasna, źmianšajecca kolkaść biełaruskamoŭnych škołaŭ, biełaruskaja mova praktyčna źnikła ź dziaržaŭnaha telebačańnia i radyjo, dyskryminacyja biełarusaŭ pa nacyjanalnaj prykmiecie nabyła masavy charaktar. Takoje asłableńnie nacyjanalnaj identyfikacyi, pieraŭtvareńnie nacyi ŭ rusyfikavanaje «nasielnictva» moža być padrychtoŭkaj dla čarhovaha «referendumu», na jakim Niezaležnaść biełaruskaj dziaržavy likvidujuć pavodle «voli narodu».
Rada BNR zajaŭlaje, što
«adzinym paratunkam dla biełaruskaha narodu źjaŭlajeca jak najchutčejšaje pazbaŭleńnie ad ciapierašniaha režymu Łukašenki i jahonych chaŭruśnikaŭ šlacham volnych, spraviadlivych i prazrystych vybaraŭ, praviedzienych pad kantrolem zachodnich instytucyjaŭ».
«Rada BNR zaklikaje biełaruskija arhanizacyi ŭ davieści da ŭradaŭ svaich krainaŭ infarmacyju pra niebiaśpieku apošnich krokaŭ Łukašenki i padtrymać niezaležnickija siły na Baćkaŭščynie», — havorycca ŭ zajavie Rady Biełaruskaj Narodnaj Respubliki.
