Fota Nadziei Bužan
Pra heta jon zajaviŭ siońnia, prymajučy z dakładam ministra adukacyi Ihara Karpienku, pieradaje BiełTA.
«Ja, viadoma ž, čytaju, baču i čuju, mianie infarmujuć, što ŭ nas nie ŭsio ŭ paradku z pastupleńniem u VNU. Da hetaha času krytyka na centralizavanaje teściravańnie. Krytykujuć novuju niejkuju mietodyku — vy vynajšli pa padliku hetych bałaŭ. Choć hałoŭnaje — nie bały, a viedy. Usie pavinny razumieć, i baćki ŭ tym liku, kali ŭ dziciaci jość viedy, to pa jakich bałach i škałach nie ličy, jany ŭsio roŭna pastupiać u VNU. Kali viedaŭ niama, nijakija bały nie dapamohuć», — adznačyŭ kiraŭnik dziaržavy.
«Skažu ščyra, što ja ŭ apošni čas, paśla taho jak vysłuchaŭ mnohich baćkoŭ (dy i ŭ mianie chapaje vučniaŭ u majoj vialikaj siamji, ja hetym cikaŭlusia), užo pačynaju zadumvacca, atrymlivajučy vialiki abjom infarmacyi, što nam, mahčyma, daviadziecca dzieści ŭdaskanalvać, miakka kažučy, sistemu pastupleńnia ŭ VNU.
Bolš za ŭsio mianie chvaluje toje, što abituryjent, jaki maryć zaŭtra stać studentam, nie zdaje ekzamieny tvaram u tvar z ekzamienataram, z vykładčykam VNU abo inšych navučalnych ustanoŭ», — zajaviŭ Alaksandr Łukašenka.
U hetaj suviazi jon zhadaŭ čas, kali sam vučyŭsia ŭ VNU, i adznačyŭ, što naŭrad ci pry teściravańni jaho vynik byŭ by lepšy, čym pry asabistaj razmovie z vykładčykam.
Pry hetym jon sam i inšyja studenty ź sielskaj miascovaści za hady vučoby zmahli značna prybavić i pierasiahnuć pa ŭzroŭni viedaŭ mnohich haradžan. «My dahaniali ŭsich haradskich, uparta pracavali i pracavali. I na vypusku ja z adznakaj zdavaŭ usie ispyty, sa mnoj nie mahli haradžanie kankuravać, jak z mnohimi takimi ž studentami», — raspavioŭ biełaruski kiraŭnik.
«Ale ja bajusia prymać rašeńnie, kab nie pamylicca. Da hetaha treba ŭvažliva stavicca. Bo pastupajuć najlepšyja dzieci z najlepšych siemjaŭ (u pieravažnaj bolšaści). Ja nie bajusia heta skazać. Tam, dzie baćki turbavalisia ŭsiu škołu — 11 hadoŭ, kab dzicia pastupiła ŭ VNU. Jany ŭsialak padtrymlivali jaho. Ja heta baču na sabie, analizujučy i pracu ŭ niadrennaj škole, supastaŭlajučy ŭzrovień navučencaŭ. My možam pry pastupleńni ŭ VNU pakryŭdzić voś hetuju častku siemjaŭ, jakija niasuć asnoŭnuju nahruzku ŭ hramadstvie, źjaŭlajucca vielmi ŭpłyvovymi ludźmi i vyznačajuć atmaśfieru našaha hramadstva i ciapier, i ŭ budučyni. Tamu mianie vielmi naściarožvaje toje, što adbyvajecca siońnia ŭ sistemie adukacyi pry pastupleńni dziaciej u VNU», — skazaŭ jon.
«Jašče raz padkreślivaju: ja nie prymaju ciapier nijakich rašeńniaŭ, bo ŭ mianie niedastatkova infarmacyi», — adznačyŭ Alaksandr Łukašenka.
Kiraŭnik dziaržavy dadaŭ, što heta i inšyja pytańni płanujuć kompleksna abmierkavać i pryniać rašeńnie na naradzie pa raźvićci śfiery adukacyi. «My pavinny surjozna viarnucca da pytańniaŭ adukacyi. I na hetaj naradzie my pavinny pierš za ŭsio zasłuchać vaša bačańnie, spravazdaču Ministerstva adukacyi i inšych, chto zajmajecca adukacyjaj, pra toje, jakaja situacyja składvajecca: škoły, VNU, padručniki, arhanizacyja sistemy adukacyi, finansavańnie. Usie pytańni my pavinny na ŭzroŭni prezidenta razhledzieć.
I pažadana, kali nieabchodna, pryniać rašeńnie, až da centralizavanaha tesciravańnia, jak udaskanalvać jaho», — skazaŭ kiraŭnik dziaržavy.
Jon dadaŭ, što viedaŭ i vopytu prymianieńnia CT užo chapaje, bačnyja najaŭnyja niedachopy. «Nie treba ich zamoŭčvać. Treba prymać rašeńnie», — upeŭnieny jon.
Alaksandr Łukašenka paznačyŭ prykładnyja terminy praviadzieńnia narady ŭ listapadzie-śniežni biahučaha hoda, pa miery hatoŭnaści abmierkavać adpaviednyja pytańni. «Treba hetuju razmovu pačynać źnizu. My źbiarom u prezidenta ludziej, jakija vyznačajuć tvar našaj adukacyi. Chutčej za ŭsio, nie z padačy Minadukacyi. Niejkuju častku na naradu zaprosicie vy, ale bolšaja častka budzie zaprošana pa inšaj formie, kab išła dyskusija. Pavinna być alternatyva, kab byli roznyja punkty hledžańnia. My ich pavinny supastavić i pryniać adpaviednyja rašeńni. Heta nie pavinna być dla hałački niejkaja pakazušnaja narada», — skazaŭ kiraŭnik krainy.
«Moža być, lepš jaje pravieści paśla parłamienckich vybaraŭ, kab nas znoŭ nie abvinavacili ŭ tym, što pad parłamienckija vybary my pravodzim hetu vielmi važnuju naradu, jakaja vyznačyć tvar našaha hramadstva ŭ budučyni», — reziumavaŭ Alaksandr Łukašenka.
