7 sakavika. Pieršy namieśnik premjer-ministra Biełarusi Ŭładzimier Siamaška padčas vizytu ŭ Rasieju zajaviŭ, što biełaruski ŭrad čakaje inicyjatyvy rasiejskaha boku ŭ pieramovach nakont utvareńnia sumiesnaha pradpryjemstva na bazie «Biełtranshazu».
Na pasiedžańni savietu ministraŭ «sajuznaj dziaržavy» ŭ hety dzień padpisanaje mižuradavaje pahadnieńnie pa hazie da 2020 h.
13 sakavika. U hazecie «Biełorusy i rynok» za podpisam Taciany Manionak źjaŭlajecca infarmacyja, što ŭ 2007 h. haz dla Biełarusi moža ŭzraści ŭ 2 razy.
30 sakavika. Na pracoŭnaj sustrečy ź ministram enerhietyki Biełarusi Alaksandram Ahiejevym i hiendyrektaram «Biełtranshazu» Dźmitryjem Kazakovym staršynia praŭleńnia «Hazpromu» Alaksiej Miller zajaviŭ, što ŭ 2007 h. pastaŭki rasiejskaha hazu buduć ažyćciaŭlacca pa eŭrapiejskich cenach. Biełaruskamu boku dali čas padumać da 30 krasavika.
4 krasavika. Na forumie «TEK Rasiei ŭ XXI st.» Alaksandar Razanaŭ, namieśnik staršyni praŭleńnia «Hazpromu», zajaviŭ, što haz dla Biełarusi padarožaje jak najmienš u 3 razy. «Heta nie palityčnaje rašeńnie, a realnaja ekanomika», – skazaŭ jon. U jakaści kampensacyi novych cenaŭ, zaznačyŭ Razanaŭ, moža być razhledžany varyjant udziełu «Hazpromu» ŭ hazavych aktyvach Biełarusi.
Pres-sakratar «Hazpromu» Siarhiej Kupryjanaŭ u etery radyjostancyi «Echo Moskvy» zajaviŭ, što cenavaja palityka kampanii adnolkavaja dla ŭsich byłych respublik SSSR.
5 krasavika. Kiraŭnik niezaležnaha analityčnaha centru «Stratehija» Leanid Zaika zajaviŭ, što «navat 80 dalaraŭ za 1000 kubametraŭ hazu – užo krytyčnaja cana dla biełaruskaj ekanomiki. U hetym vypadku surjoznyja finansavyja prablemy ŭźniknuć jak minimum u traciny pradpryjemstvaŭ – prablemy, źviazanyja z prybylnaściu, z zabieśpiačeńniem kankurentazdolnaści pradukcyi. Chacia niekatoryja ekanamisty nazyvajuć krytyčnaj canu ŭ 135 dalaraŭ».
12 krasavika. Ministar enerhietyki A.Ahiejeŭ znoŭ pravioŭ pieramovy z «Hazpromam», adnak nie prapanavaŭ stvaryć sumiesnaje pradpryjemstva na asnovie «Biełtranshazu». Zamiž hetaha rasiejcam prapanavali prakładku druhoj nitki hazapravoud Jamał–Eŭropa, stvareńnie padziemnaha schovišča hazu, udzieł u budaŭnictvie Biarozaŭskaj DRES (Bieraściejskaja vobłaść).
13 krasavika. Pieršy namieśnik Nacbanku Biełarusi Jury Ałymaŭ zajaviŭ, što rezkaje pavyšeńnie cany na rasiejski haz pryviadzie da prablemaŭ z abmiennym kursam nacyjanalnaj valuty.
16 krasavika. Rasiejski fond «Hramadzkaja dumka» apublikavaŭ vyniki apytańnia: 56% hramadzianaŭ Rasiei ŭchvalajuć namier «Hazpromu» ŭźniać z 2007 h. canu na haz dla Biełarusi, 19% ličać heta niapravilnym, 25% było ciažka adkazać.
17 krasavika. BIEŁTA paviedamiła, što dla nasielnictva z 15 krasavika pavyšajecca płata za techabsłuhoŭvańnie kvateraŭ, z 1 traŭnia pavysiacca taryfy na elektraenerhiju i haz (pryrodny i zvadkavany), z 1 červienia – na ciepłavuju enerhiju dla aciapleńnia i haračaj vady, z 1 lipienia – na chałodnuju vadu i kanalizacyju, z 1 žniŭnia – na vyvaz pobytavych adkidaŭ.
27 krasavika. Pasoł Rasiei ŭ Biełarusi Alaksandar Surykaŭ u interviju vydańniu «Vriemia novostiej», abmijarkoŭvajučy hazavyja perturbacyi, zajaviŭ, što tranzyt praź «Biełtranshaz» moža akazacca nulavym: «A truba biaz hazu – heta prosta kavałak žaleza, zakapany ŭ ziamlu. Tolki napaŭnieńnie hazam daje trubie žyćcio».
28 krasavika. Pres-sakratar «Hazpromu» zajaviŭ, što Biełaruś dahetul nie adkazała na prapanovy rasiejskaj kampanii nakont novaj cany na haz.
10 traŭnia. Hiendyrektar «Biełtranshazu» Dz.Kazakoŭ u interviju «Interfaksu» raspavioŭ, što pieramovy z «Hazpromam» praciahvajucca. Premjer-ministar S.Sidorski daručyŭ Ministerstvu enerhietyki raspracavać i ŭnieści prapanovy pa ŭdziele Biełarusi ŭ zdabyčy rasiejskaha hazu.
12 traŭnia. Rasiejskaja hazeta «Kommiersant'» paviedamiła, što napiaredadni biełaruski bok padaŭ kiraŭnictvu «Hazpromu» svaje prapanovy. Hazeta paviedamiła, što ŭsie jany, pavodle jaje infarmacyi, byli adchilenyja, bo nie davali rasiejskamu boku manapolnaha kantrolu nad biełaruskimi hazapravodami. Hazeta ćvierdzić, što vusnaje rasparadžeńnie pa źmienie palityki ŭ dačynieńni da Biełarusi 9 traŭnia daŭ prezydent Rasiei Pucin.
17 traŭnia. Pieršy vice-premjer U.Siamaška zajaviŭ žurnalistam, što Biełaruś hatovaja addać 50% akcyjaŭ «Biełtranshazu» ŭ abmien na aktyvy hazazdabyvalnych kampanijaŭ u struktury «Hazpromu», kab Biełaruś mahła zdabyvać u Rasiei štohod 10–12 młrd kubametraŭ hazu.
19 traŭnia. Rasiejski premjer-ministar Michaił Fradkoŭ na presavaj kanferencyi ŭ Miensku paśla sustrečy kiraŭnikoŭ uradaŭ krainaŭ EŭrAzES zajaviŭ, što zamarudžvańnie ŭ vyrašeńni pytańnia z cenami na haz i hazatranspartnaj systemaj nie adpaviadaje intaresam Biełarusi j intehracyjnym pracesam pamiž Biełarusiaj i Rasiejaj.
22 traŭnia. Minenerhietyki Biełarusi prapanavała «Hazpromu» pravieści čarhovy raŭnd pieramovaŭ.: Biełaruś zhodnaja pavialičyć canu na haz na 11% – da 51,8 dalara za 1000 kubametraŭ, što adpaviadaje ŭnutrarasiejskim cenam.
26 traŭnia. Pra pahrozu Biełarusi vyjści z składu «sajuznaj dziaržavy» praviedamiła vydańnie «Kommiersant'». Pahroza, pavodle źviestak hazety, była ŭ kanfidencyjnym liście premjera Sidorskaha, jaki toj nakiravaŭ na adras rasiejskaha premjera Fradkova jašče 15 traŭnia.
Pres-sakratar Sidorskaha Alaksandar Cimašenka ŭ toj samy dzień abvierh najaŭnaść takoha lista: «Vy kamu bolej vierycie – hazecie «Kommiersant'» ci našamu prezydentu?» U svoj čarod, vydańnie zajaviła, što ichnaja krynica infarmacyyi ŭ Kramli – sam Pucin.
30 traŭnia. Dziaržsakratar «sajuznaj dziaržavy» Pavał Baradzin, kamentujučy novuju prapanovu «Hazpromu» ŭ 200 dalaraŭ za 1000 kubametraŭ, zajaviŭ, što «hazavaje pytańnie» budzie vyrašacca na ŭzroŭni prezydentaŭ.
5 červienia. Hazeta «Kommiersant'» paviedamiła, što 2 červienia biełaruski premjer-ministar Siarhiej Sidorski pahadziŭsia na stvareńnie biełaruska-rasiejskaha sumiesnaha pradpryjemstva na bazie «Biełtranshazu» ŭžo ŭ 2006 h.: «Možna čakać stvareńnia SP ci jakoj-niebudź inšaj struktury».
8 červienia. Rasiejski pasoł u Biełarusi Surykaŭ zajaviŭ, što cana na haz dla Biełarusi kančatkova budzie sfarmavanaja da kanca hodu: «Cana na haz zaležyć ad cany nafty i kančatkova daśpieje da listapada».
