Siońnia Franaka Viačorku dastavili ŭ minski vajskovy špital, dzie mieli vyrašyć – pakidać jaho ŭ stalicy, ci advieźci u adzin z rehijanalnych špitaloŭ. Pra heta Franak paviedamiŭ pa telefonie.
Jon patłumačyŭ, što paśla vykanańnia fizičnych praktykavańniaŭ u jaho ŭźniaŭsia cisk i ŭźnikli prablemy z sercam.U paliklinicy Respublikanskaha vajskovaha špitalu jon prademanstravaŭ vyniki niezaležnaha abśledavańnia, praviedzienaha niezadoŭha da pryzyvu ŭ vojska.
«Tyja vyniki značna adroźnivalisia ad aficyjnaha vajenkamataŭskaha abśledavańnia — ź jaho vynikała, što spravy z sercam ŭ mianie kudy sur'źniej». Ale tyja papiery pakinuli biez uvahi. Franaku zajavili, što hety dakumient nie maje jurydyčnaj siły i što treba prajści abśledavańnie ŭ vajskovym špitali. U Respublikanski vajskovy špital Viačorku nie pakłali, patłumačyŭšy, što dla hetaha jamu treba adsłužyć try miesiacy, niby tolki paśla hetaha jon traplaje pad poŭnuju jurysdykcyju vajskovych miedykaŭ. A dahetul jaho mohuć pakłaści ŭ adzin z rehijanalnych vajskovych špitaloŭ. U jaki kankretna – vyznačycca ciaham niekalkich dzion. Franak raspavioŭ, što ŭ paliklinicy sustreŭ Źmitra Chviedaruka, jamu taksama paviedamili pra adterminoŭku lačeńnia ŭ RVŠ. «Heta moža śviedčyć pra toje, što ŭłady pakul nie hatovyja ŭziacca za surjoznuju acenku našaha zdaroŭja, pryznać svaje pamyłki i kamisavać nieprydatnych dla vajskovaj słužby ludziej» – zajaviŭ F. Viačorka.
Nahadajem, što 16 lipienia 2008 hoda miedkamisija vajenkamata Savieckaha rajona Minska pryznała F.Viačorku nieprydatnym da vajennaj słužby pa stanie zdaroŭja. Abłasnaja miedkamisija pastaviła hetaje rašeńnie pad sumnieńnie i nakiravała maładoha čałavieka na abśledavańnie ŭ vajskovy špital, dzie jamu dali adterminoŭka ad słužby da sakavika 2009 h. Adnak 16 studzienia vajenkamat Savieckaha rajona Minska pryznaŭ Viačorku prydatnym da słužby ŭ vojsku, a sud hetaha ž rajona, dzie było abskardžana rašeńnie vajenkamata, 23 studzienia pakinuŭ hetaje rašeńnie ŭ sile.
7 lutaha Franak pryniaŭ prysiahu ŭ 8-j radyjotechničnaj bryhadzie ŭ Baranavičach.
Adsiul jaho nakiravali ŭ Mazyr u v/č № 48694 supraćpavietranaj abarony.
***
Napisać Franaku Viačorku možna pa adrasie: 247760 Mazyr, vuł. Astroŭskaha, 168 v/č № 48694.