Manrealskaje vydańnie La Presse nadrukavała artykuł ab ciesnym znajomstvie biełaruskich chakieistaŭ Andreja i Siarhieja Kaścicynych z narkadyleram Paskualem Madžołam.
Jak paviedamlaje hazieta, adzin z padazravanych u spravie handlu narkotykami, zachoŭvańni i abarocie kakainu, niezakonnym našeńni ahniastrelnaj zbroi Paskual Madžoła źjaŭlajecca «dobrym siabram» hulcoŭ kłuba NCHŁ «Manreal Kanadyjans» biełaruskich bratoŭ Kaścicynych. Heta stała viadoma haziecie z palicejskich krynic.
Paskual Madžoła byŭ aryštavany ranicaj 12 lutaha, jon byŭ pasiarednikam miž tryma bandami, što dziejničajuć na paŭdniovym zachadzie Manrealu. Jak vyśvietlili palicejskija, Madžoła źjaŭlajecca vialikim amataram chakieju. Jon pa niekalki razoŭ u tydzień razmaŭlaŭ ź Siarhiejem i Andrejem Kaścicynymi. Heta paćvierdziłasia razdrukoŭkami telefonnych razmovaŭ dylera z hulcami.
Madžołu i Kaścicynych časta bačyli razam u barach i restaranach bulvaru Łaran u Manreali. Časam jany źbiralisia paśla hulniaŭ.
Pa źviestkach La Presse, Madžoła hraje vielmi značnuju rolu ŭ žyćci bratoŭ. Jon pryniaŭ Kaścicynych pad svajo kryło adrazu pa pryjeździe biełarusaŭ u Kanadu. Jon zahadvaŭ pakupkami chakieistami, dapamahaŭ im znajści kvatery, aŭtamabili. Kaścicyny nie saromielisia telefanavać Paskualu, kali im niešta treba było — ałkahol, mašyny, žančyny i inšaje. Jany viedali, što Madžoła chutka vyrašyć ichnyja prablemy.
Razam z Madžoła sustrakali taksama jašče adnaho jeŭrapiejskaha hulca «Manreala» — čecha Hamralika, ale jon byŭ nie nastolki blizki da narkadylera, jak našy chłopcy.
Aficyjnaja reakcyja «Manrealu» była pradkazalnaj: «My nie viedali ab takich suviaziach».
Andrej Kaścicyn paśla hulni z «Pitsburham» zajaviŭ, što viedaje Madžołu, ale ničoha nie čuŭ pra jahonuju nielehalnuju dziejnaść.
Ciapier Madžoła moža znoŭ apynucca na voli, kali ŭniasie zakład u pamiery 45 tysiač dalaraŭ. Heta ŭžo nie pieršy sud nad Madžołam. Raniej jaho sudzili za napad na aficera, a taksama za padrobku kredytnych kartak.
